Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 956 Hüküm no: 1643 Orijinal metin no: [138b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi Seyyid Hacı Ömer’in alacağı olduğu iddiasıyla Çörekçi Seyyid Mustafa aleyhine açtığı davada sulh olduğu Ma‘rûz Mahmiye-i İslâmbol hısnı ebvâbından Odunkapısı dâhilinde sâkin Çörekçi es-Seyyid el-Hâc Ömer b. es-Seyyid Ali medîne-i Üsküdar’da mahfil-i Bâb’da meclis-i şer‘-i hatîrde medîne-i mezbûrede Toptaşı nâm mahâlde sâkin Çörekçi es-Seyyid Mustafa b. Osman mahzarında bin iki yüz bir senesi Şa‘bânü’l-mu‘azzamı’nın gurresi târihiyle müverrah işbu yedimde olan temessük mûcebince yedimden istikrâz ve kabz ve umûruna sarfla istihlâk eylediği dört yüz altmış guruş deyni mukābilesinde sâlifü’z-zikr Toptaşı nâm mahâlde vâki‘ taht-ı icâresinde olan çörekçi fırını derûnunda mevcûd beyne’l-esnâf gedik ta‘bîr olunur dört sehm âlât-ı lâzıme-i ma‘lûmede olan üç sehm hissesinin bir sehmini deyn-i mezkûr mukābilesinde istiğlalen rehin vaz‘ ve teslîm etmekle meblağ-ı merkūm dört yüz altmış guruş ile beynimizde ma‘lûm hisse-i mezkûre icâresinden işbu târih-i i‘lâma gelince beher şehr beşer guruşdan elli üç aylık müctemi‘a olan iki yüz altmış beş guruş ki cem‘an yedi yüz yirmi beş [guruş] zimmetinde hakkım olmağla rehn-i mezkûru ba‘de’l-fekk meblağ-ı mecmû‘-ı merkūm yedi yüz yirmi beş guruşu taleb ederim deyü ba‘de’d-da‘vâ ve’l-istintâk mezbûr es-Seyyid Mustafa ancak müdde‘î-i merkūma cihet-i mezkûreden dört yüz guruş deyni olduğunu ikrâr ziyâde üç yüz yirmi beş guruşunu inkârından mâ‘adâ bilâ-devr murâbaha olmak üzere müdde‘î-i mezbûra iki yüz kırk guruş def‘ ü teslîm etmişdim deyü da‘vâ ve beynlerinde ba‘de vukū‘i’l-münâza‘a beynlerine muslihîn tavassut edip müdde‘î-i mezbûr ziyâde müdde‘âsı olan üç yüz yirmi beş guruşa müte‘allika âmme-i de‘âvîden mezbûr es-Seyyid Mustafa’nın zimmetini ibrâ ve ıskāt eyledikde ol dahi mukaddemâ murâbaha nâmıyla medfû‘u olan iki yüz kırk guruşa müte‘allika âmme-i de‘âvîden mezbûr es-Seyyid el-Hâc Ömer’in zimmetini ibrâ ve ıskāt ve herbiri âharın ibrâsını ba‘de’l-kabûl mezbûr es-Seyyid Mustafa mukırr u mu‘terif olduğu meblağ-ı merkūm dört yüz guruşu müdde‘î-i mezbûra edâya mezbûr es-Seyyid Mustafa’ya rehn-i mezkûru fekki müdde‘î-i mezbûr es-Seyyid el-Hâc Ömer’den herbirine şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 22 min-R sene 1207.