Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 957 Hüküm no: 1644 Orijinal metin no: [138b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Mehmed’in mirasından hakkını alamadığı iddiasıyla dava açan mirasçılardan Numan’ın alacağı olduğu Ma‘rûz Medîne-i Üsküdar’da Aşcıbaşı mahallesinde sâkine bundan akdem fevt olan Hadice bt. Mehmed nâm hatunun zevc-i metrûku eş-Şeyh Mehmed Emin Efendi b. el-Hâc Hasan ile zî-rahm cihetinden li-ebeveyn hâli oğlu Numan b. Mehmed Ali nâm kimesneye münhasıra ve terekesinin nısfı zevc-i mezbûra ve nısf-ı âharı mezbûr Numan’a isâbeti tahakkukundan sonra sâhib-i arzuhâl mezbûr Numan Çarşamba günü huzûr-ı âlîlerinde ba‘dehû Üsküdar Mahkemesi’nde ma‘kūd meclis-i şer‘de derûn-ı arzuhâlde mezkûr müteveffiye-i mezbûrenin terekesinden bi’l-verâse vâzı‘ü’l-yed olan zevc-i mezbûr eş-Şeyh Mehmed Emin Efendi mahzarında mûrisem müteveffiye-i merkūme Hadice Hatun’un terekesinden olmak üzere nakden bin iki yüz guruş ve üç yüz guruş kıymetli bir çift zümrüd küpe ve bir zümrüd yüzük ve bir çift altın bilezik ve on entari ve iki Lahorî şal ve bir sincab kürk ve bir karsak kürk ve iki destâr ve bir anbar ve bir orta döşemesi ve ma‘lûmü’l-mikdâr evânî-i nühâsiyenin hisse-i irsiyeme isâbet eden hakkımı mezbûr es-Seyyid Mehmed Emin Efendi fuzûlî zabt etmekle taleb ederim deyü da‘vâ ol dahi cevâbında müdde‘î-i mezbûrun müdde‘âsı olan nakid ve eşyâ-i mezkûreyi inkârından mâ‘adâ müteveffiye-i mezbûre Hadice Hatun on altı guruş mehir ile zevcem olup hayatında işbu yedime i‘tâ eylediği bir kıt‘a mübâya‘a hücceti nâtıka olduğu üzere eşyâ-i memlûkesinden dört minder ve altı şayak yasdık ve üç köşe minderi ve bir orta keçesi ve iki döşek ma‘a çârşeb ve altı baş yasdığı ve altı yorgan ma‘a çârşeb ve iki çuka mak‘ad ve bir mangal ve iki leğen ibrik ve bir âbdest leğeni ve iki sini ve iki tepsi ve bir güğüm ve beş tencere ma‘a kapak ve on iki sahan ma‘a kapak ve iki tas ve iki lenger ve iki hasır ve iki döşek şiltesinden gayrı ism-i mâl ıtlâk olunur nesnesi olmayıp ma‘an sâkin olduğumuz menzil derûnunda mevcûde mefrûşât ve melbûsât ve evânî-i nühâsiye ve bi’l-cümle esâs-ı beytde alakası olmadığını ikrâr ve eşyâ-i muharrere-i mezkûreyi dahi iki yüz guruşa bana bey‘ ve temlik ve semen mutâlebesinden zimmetimi ibrâ ve ıskāt eyledikde ben dahi ba‘de’l-iştirâ bir şey kabûl etmişdim deyü ba‘de’d-def‘ ve’l-inkâr mezbûr eş-Şeyh Mehmed Emin Efendi ber-vech-i muharrer eylediği def‘ini udûlden Derviş Mehmed Emin b. İbrahim ve es-Seyyid Mustafa b. Hasan nâm kimesneler şehâdetleriyle ber-nehc-i şer‘î muvâcehesinde isbât etmeğin mûcibiyle müdde‘î-i mezbûr Numan derûn-ı hüccet-i mezkûrede muharrer bî-vech-i şer‘î eşyâ-i mersûme mutâlebesinden men‘ ve hâric ez-hüccet mutâlebe eylediği nakid ve eşyâ-i muharrere-i mezkûreyi isbâta ba‘de’l-havâle mezbûr eş-Şeyh Mehmed Emin Efendi’nin mu‘terif olduğu mehr-i meblağ-ı merkūm on altı guruşun nısfı sekiz guruşu müdde‘î-i mezbûr Numan’a edâsıyla şer‘an ilzâm olunduğu mübâşiri çavuş kulları iltimasıyla huzûr-ı âlîlerine i‘lâm olundu. Fî 28 min-Cumâdelâhire sene 1206.