|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 261 Hüküm no: 365 Orijinal metin no: [53b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
İbrahim Çelebi ve el-Hâc İsmail’in Dilaver kölelerini âzat ettikleri
Mahmiye-i İstanbul’da Samanveren Mahallesi’nde sâkin İbrahim Çelebi b. el-Hâc Hasan asâleten ve li-ebeveyn karındaşı el-Hâc İsmail tarafından ıtk-ı âti’l-beyânı ikrâra vekîl olup vekâleti hasm-ı câhid-i şer‘î mahzarında nehc-i mu‘teber-i mer‘î üzere sâbite olmağın vekâleten mahfil-i kazâda mülk-i mevrûsları rıkkına mu‘terif olan işbu açık kaşlı, gök elâ gözlü, orta boylu, sarışın, Rusiyyü’l-asl hâmil-i hâze’l-kitâb Dilaver b. Abdullah mahzarında ikrâr-ı tâm ve takrîr-i kelâm edip gulâm-ı mevsûf-ı mezbûru hasbeten lillâhi te‘âlâ ve hasbeten li-rûhi rasûlihi’l-mu‘allâ malımızdan âzâd ve mülkümüzden ihrâc edip tahrîr ve i‘tâk eyledik, ba‘de’l-yevm benim ve müvekkil-i mezbûrun mevsûf-ı mezbûr Dilaver üzerinde hakk-ı velâdan gayrı bir şeyimiz kalmadı, sâir ahrâr-ı asliyyîn gibi hür olsun dedikde gıbbe’t-tasdîk ve’t-taleb mâ-vaka‘a ketb ü sebt olundu.
Tahrîren fi’l-yevmi’s-sâbi‘ ve’l-ışrîn min-Cemâziyelâhire li-sene erba‘a ve sittin ve elf.
Şuhûdü’l-hâl: Pîrî Beşe b. Hüseyin, Ali Beşe b. Abdullah çukadâr, Rıdvan b. Abdullah, Mehmed b. Abdullah, Muharrem Çelebi b. Hüseyin, Hüseyin b. Mustafa, Mehmed Çelebi b. Hüseyin, Mehmed kemhacı ve gayruhum.
|