Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 478 Hüküm no: 550 Orijinal metin no: [114a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Bayezid-i Veli mütevellîsine açılan davanın geçersiz olduğu Ma‘rûz. Ashâb-ı arzuhâl Panayot v. Kosta ve Yani v. Tanaş ve Vasil v. Yani ve Yanaki v. Mihal ve Yani v. Nikola ve Mihal v. Petro ve Espandon v. Lipo ve Kiryazi v. Danyel ve Simo v. Totori ve İstimat v. Yani ve Nikola v. Dimitri nâm zimmîler hasımları olan sâbıkā Sultan Bayezid-i Veli mütevellîsi Ahmed Efendi b. Abdullah b. Abdurrahman tarafından vekîl-i şer‘îsi Halil Ağa ile murâfa‘a-i şer‘ olunduklarında merkūmûn zimmîler müvekkil-i mezbûr Ahmed Efendi zimmetinde derûn-ı arzuhâlde zikrolunduğu üzere ücretlerinden bâkī iki yüz yetmiş guruş hakları olduğunu da‘vâ ve vekîl-i mezbûr dahi cevâbında târih-i i‘lâmdan üç ay mukaddem husûs-ı mezkûr için ba‘de vukū‘ı’l-münâza‘a muslihûn tavussutuyla müvekkil-i mezbûr Ahmed Efendi mezbûrûna otuz guruş def‘ ve teslîm edip onlar dahi ba‘de’l-ahz u kabz mâ‘adâya müte‘allika âmme-i da‘vâdan müvekkil-i mezbûrun zimmetini ibrâ-i âm ile ibrâ ve iskāt eylediler deyü def‘ ve def‘-i meşrûhunu muvâcehelerinde dört nefer şâhid-i adl ile vech-i şer‘î üzere isbât etmeğin merkūmûn zimmîler bî-vech mu‘ârazadan men‘ olunmuşdur. Fermân men-lehü’l-emrindir. Fî-gurreti Cemâziyelevvel sene [1]143.