.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 261
Hüküm no: 366
Orijinal metin no: [54a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


el-Hâc Mehmed hacda iken ailesinin ihtiyaçlarını karşılayan İbrahim b. Süleyman’ın parasını geri aldığı

Mahmiye-i İstanbul’da Hocapaşa kurbünde Çerkes Mahallesi’nde sâkin çiçekçi tâifesinden İbrahim b. Süleyman nâm kimesne meclis-i şer‘-i hatîr-i lâzımü’t-tevkīrde işbu râfi‘u’l-kitâb el-Hâc Mehmed b. Pîrî mahzarında ikrâr-ı tâm ve takrîr-i kelâm edip mezbûr el-Hâc Mehmed Bey altmış üç senesinde hacc-ı şerife müteveccih oldukda bana benim ehl ü ıyâlimi sen mâlından infâk eyle her ne harc edersen ben sana edâ ederim deyü emr edip vech-i muharrer üzere ehl ü ıyâlini infâka beni tevkîl eylemiş idi, ben dahi mezbûrun emri ile ehl ü ıyâlini infâk edip mâlımdan on yedi bin akçe harc ve sarf etmişdim. Hâlâ meblağ-ı mezbûr on yedi bin akçeyi merkūm el-Hâc Mehmed yedinden bi’t-tamam ve’l-kemâl ahz u kabz eyledim, min-ba‘d meblağ-ı mezbûrdan zimmetinde bir akçe ve bir habbe hakkım kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu.

Tahrîren fi’l-yevmi’s-sâmin ve’l-ışrîn min-Cemâziyelâhire li-sene erba‘a ve sittin ve elf.

Şuhûdü’l-hâl: el-Hâc Mustafa b. Hasan, el-Hâc Hüseyin b. Osman, el-Hâc Mustafa b. Mahmud, Mehmed Çelebi b. Mustafa, Mustafa Bey b. Nasuh, Şa‘ban Çelebi b. Ömer Çavuş, Mahmud b. Celil, Receb b. Celil, Rıdvan b. Abdullah, Mehmed Çelebi b. Hüseyin ve [gayru]hum.