Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 481 Hüküm no: 560 Orijinal metin no: [114b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahalle ahalisinin Karabet zimmînin herhangi bir kötü halini görmedikleri Ma‘rûz. Derûn-ı arzuhâlde mezkûr husûsu tefahhus için kıbel-i şer‘den irsâl olunan Mustafa Efendi dâ‘îleri sâhib-i arzuhâl Karabet zimmînin menziline varıp husûs-ı mezkûru hem-civârlarından tefahhus eylediğinde her biri husûs-ı mezkûrdan kat‘â haber ve âgâhımız yokdur dediklerinden mâ‘adâ birbirlerinin nefislerine ve hîn-i talebde huzûr-ı hükkâma ihzâra kefîl olduklarından sonra Mahallesi imâmı Hüseyin Efendi ve el-Hâc Yusuf ve es-Seyyid Süleyman Çelebi ve ahâlîsinden müseccelü’l-esâmî on iki nefer kimesneler fi’l-hakīka mezbûr Karabet kendi ırzıyla mukayyed ve bu ana gelince hem-civârlarını ve sâirini rencîde ve ta‘cîz ve kat‘â sû-i hâl üzere olduğu ma‘lûm ve mesmû‘umuz olmayıp her vechile kendiden hoşnûd ve emînleriz dediklerini mahallinde tahrîr ve ma‘an ba‘s olunan ümenâ-i şer‘le meclis-i şer‘a gelip inhâ eylediği huzûr-ı âlîlerine i‘lâm olundu. Fermân men-lehü’l-emrindir. Fî 3 Cumâdelûlâ sene [1]143.