Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 482 Hüküm no: 562 Orijinal metin no: [115a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şîrugancı esnafının nizamına aykırı iş yapan Aharbet ve Reyhan zimmîlerin meslekten çıkarılması talebi Ma‘rûz. Şîrugâncı hırfetinin kethüdâları İbrahim ve erbâbından el-Hâc Mehmed ve es-Seyyid el-Hâc Ali ve el-Hâc Osman ve el-Hâc İbrahim ve mektûbü’l-esâmî on dört nefer kimesne ile ehl-i zimmetden yirmi beş nefer re‘âyâ meclis-i şer‘de hırfet-i mezkûreden Aharbet nâm zimmî muvâcehesinde tüccâr tâifesi yediyle İstanbul’a gelen susam kadîmü’l-eyyâmdan berü cümle ma‘rifetiyle ba‘de’l-iştirâ muktezâ-yı kadîm üzere beynimizde tevzî‘ ve taksîm ve narh-ı cârî üzere ibâdullâha bey‘ edegelip bu vech üzere nizâm-ı hâlimiz var iken mezbûr Aharbet ve gāib ani’l-meclis Reyhan zimmî hisselerine kanâ‘at etmeyip zikrolunan susamı tüccâr tâifesinden hufyeten hissesinden ez-yed iştirâ ve bu vechile bize gadrdan hâlî olmadığından mâ‘adâ gâh revgan-ı bezîr ile halt ve gâh narhından ziyâde ile âhara bey‘ edip ibâdullâhı ızrâr ve beynimizde ihtilâle bâ‘is olmağın mezbûrândan bir vechile râzı ve hoşnûd ve emîn değilleriz deyü her biri teşekkî ve sû-i hâllerini ihbâr edip içlerinden ihrâc ve min-ba‘d hırfet-i mezkûr umûruna müdâhale ettirmemek murâd ederler. Fermân men-lehü’l-emrindir. Fî 3 Cumâdelûlâ sene [1]143.