Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 483 Hüküm no: 563 Orijinal metin no: [115a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukadâr Mehmed Beşe’den cariyenin bedelinin tazmini Ma‘rûz. Çukadâr Ali Beşe mübâşeretiyle ihzâr-ı şer‘ olunan Dergâh-ı âlî yeniçeri çavuşlarından Ahmed Çavuş nâm kimesneden hasmı Mehmed Beşe nâm kimesne meclis-i şer‘de târih-i i‘lâmdan iki sene mukaddem diyâr-ı Acem’de Gence nâm kasabada yedimde mülk ve hakkım olan yüz elli guruş kıymetli bir re’s Bedirhan nâm Acem câriyemi İstanbul’a irsâl için mezbûr Ahmed Çavuş’a def‘ ve teslîm etmişidim hâlâ câriye-i mezbûre mevcûd ise aynını müstehlek ise ba‘de’s-sübût kıymet-i şer‘iyyesini taleb ederim deyü da‘vâ eyledikde mezbûr Ahmed Çavuş dahi cevâbında fi’l-hakīka târih-i merkūmda kasaba-i mezbûrede müdde‘î-i mezbûr kırk guruş kıymetli bir re’s Acem câriyesini ber-vech-i muharrer kendiye def‘ ve teslîm eylediğini ikrâr lâkin câriye-i mezbûreyi târih-i mezbûrda işbu hâzır bi’l-meclis Çukadâr Mehmed Beşe nâm kimesne müdde‘î-i mezbûr Mehmed Beşe vefât etmişdir ve terekesi cânib-i beytülmâle âid olmuşdur deyü kasaba-i mezbûrede emîn-i beytülmâl tarafından vekâleten gelip bi-gayr-ı hakkın yedimden ahz eyledi dedikde Mezbûr Çukadâr Mehmed Beşe dahi istintak olundukda cevâbında müdde‘î-i mezbûr Mehmed Beşe vefât etmek üzere mesmû‘um olup binâen-aleyh beytülmâle âid olmak üzere müdde‘î-i mezbûrun sâlifü’z-zikr kırk guruş kıymetli bir re’s Bedirhan nâm câriyesini merkūm Ahmed Çavuş yedinden ahz edip ba‘dehû âhara bey‘le istihlâk olduğunu ikrâr u i‘tirâf etmekle mûcebince ikrâr-ı mertebesi olan kırk guruşu müdde‘î-i mezbûra teslîme merkūm Çukadâr Mehmed Beşe’ye tenbîh olunduğu bi’l-iltimâs huzûr-ı âlîlerine i‘lâm olundu. Fî-gurreti Cumâdelûlâ sene [1]143.