Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 483 Hüküm no: 564 Orijinal metin no: [115a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbradi kazasından Şaban’ın davasının meşru olmadığı Ma‘rûz. Anadolu’da İbradi kazâsı ahâlîsinden olup İstanbul’da Kebeciler Hanı’nda müsâfiren sâkin sâhib-i arzuhâl Şa‘ban meclis-i şer‘de hasmı derûn-ı arzuhâlde mezkûrü’l-ism es-Seyyid Salih muvâcehesinde târih-i i‘lâmdan altı ay mukaddem zikrolunan kazâda sâkine vâlidesinin Yusuf nâm gulâmını benim için katleyledi deyü da‘vâsı olmak üzere Alâiye vâlîsine ve kādısına hitâben ısdâr eylediği fermân-ı âlîşânı bu tarafdan vâlidesine gönderip ol dahi beni vâlî-i merkūm tarafından ahz ve mahkemeye ihzâr ve murâfa‘a ve hizmet nâmıyla vâlî-i merkūmun mübâşirleri yüz guruşumu alıp mezbûr es-Seyyid Salih sebeb olmağla meblağ-ı mezbûru kendiden tazmîn murâdımdır deyü da‘vâ eylediğinde mezbûr Şa‘ban’ın takrîri üzere da‘vâ-yı meşrûhası sahîha olmayıp hasmı mezbûra suâl dahi tevcîh etmemeğin müdde‘î-i mezbûr Şa‘bân bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 5 Cumâdelûlâ sene [1]143.