.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 262
Hüküm no: 367
Orijinal metin no: [54a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Mustafa ve Râbia’nın babalarından kalan evlerini sattıkları

Mahmiye-i İstanbul’da Debbağ Yusuf Mahallesi’nde sâkine Râbia bt. Mustafa nâm hatun tarafından zikr-i âtî bey‘ ve kabz-ı semeni ikrâra vekîl olup mezbûreyi ma‘rifet-i şer‘iyye ile ârifân olan Süleyman b. Şükrullah ve Şa‘ban b. Muharrem nâm kimesneler şehâdetleri ile şer‘an vekâleti sâbite olan Ali Efendi b. Ahmed nâm kimesne meclis-i şer‘-i hatîr-i lâzımü’t-tevkīrde işbu râfi‘u’l-kitâb İbrahim Beşe b. Hasan mahzarında bi’l-vekâle ikrâr-ı tâm ve takrîr-i kelâm edip müvekkilem mezbûrenin li-ebeveyn karındaşı Mustafa ile kendüye babalarından intikāl edip mülk-i mevrûsları olan mahall-i mezbûrede vâki‘ bir tarafı el-Hâc Hüseyin b. Abdullah mülküne ve [bir] tarafı Süleyman Efendi nâm [kimesne] mülküne ve iki tarafı tarîk-i âmma müntehî iki bâb fevkānî oda ve iki bâb tahtânî oda ve havluyu ve kenîfi müştemil menzili karındaşı mezbûr Mustafa bi-cümleti’t-tevâbi‘ ve’l-levâhık mezbûr İbrahim Beşe’ye bey‘-i bâtt-ı sahîh-i şer‘î ile kırk yedi bin beş yüz akçeye bey‘ ve teslîm edip ol dahi minvâl-i muharrer üzere iştirâ ve kabûl ve tesellüm eyledikden sonra müvekkilem mezbûre Râbia merkūm Mustafa’dan dört bin fıddî râyicü’l-vakt akçeyi tamamen ahz u kabz eyleyip mezbûr Mustafa’nın müvekkilesinden hisse-i bey‘i tahrîr eyledi, menzil-i mezbûrda müvekkile-i mezbûrenin min-ba‘d alâka ve medhali kalmadı dedikde mezbûr İbrahim Beşe vekîl-i merkūmun vech-i meşrûh üzere cârî ve sâdır olan kelimâtını bi’l-muvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb ü sebt olundu.

Tahrîren fi’l-yevmi’s-sânî min-Recebi’l-ferd li-sene erba‘a ve sittin ve elf.

Şuhûdü’l-hâl: el-Hâc Ca‘fer b. Behram, el-Hâc Süleyman b. Sefer, Şa‘ban b. Muharrem, Ahmed b. Hasan, Abdülgani b. Mehmed Dede, el-Hâc Ahmed Çelebi b. Mahmud, Abdullah Efendi el-imâm, Süleyman Efendi el-imâm ve gayruhum.