Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 490 Hüküm no: 577 Orijinal metin no: [117a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Larende kalesine açılan üçüncü kapının emniyetsiz olduğu için kapatılması talebi Ma‘rûz. Vilâyet-i Anadolu’da Larende kasabası ahâlîsinden olup İstanbul’da müsâfiren sâkinler olan talebe-i ulûmdan Mustafa Efendi b. Ali ve Kale Mahallesi ahâlîsinden es-Seyyid Mahmud b. İbrahim ve Osman b. el-Hâc İbrahim ve es-Seyyid Abdullah Efendi b. es-Seyyid Hızır Efendi ve es-Seyyid Molla Mahmud b. Hüseyin ve tüccâr tâifesinden Abdullah Çelebi b. el-Hâc Mehmed ve medîne-i mezbûreye karib Gaferyab [Gaferyat] kasabası ahâlîsinden Abdullah Efendi b. Mehmed nâm kimesneler meclis-i şer‘de fi’l-hakīka zikrolunan Larende kal‘asının kadîmü’l-eyyâmdan bu ana gelince iki kapısı olup ahâlîsine ve sâir mürûr [ve] ubûr eden ebnâ-yı sebîle vâfî iken maktûl İbrahim Paşa etbâ‘ından Deli Bekir nâm kimesne bir sene mukaddem kasaba-i mezbûrede voyvoda olup garaz-ı fâsidini icrâ için kal‘a-i mezbûreye bir kapı dahi ihdâs etmekle kal‘a dâhilinde olan sâhib-i arzuhâl Hüseyin Ağa’nın menzilini bâb-ı mezbûra tarîk i‘dâd için hedm ve zikrolunan muhdes kapıyı feth ü sed eder bevvâb dahi olmamağla bir vechile emniyetimiz kalmadığından mâ‘adâ hâric-i kal‘ada olan mekābir-i Müslimîni dahi tarîk ihdâsıyla ta‘tîl etmişdir deyü her biri alâ-tarîkı’ş-şehâde ba‘de’l-ihbâr mârru’z-zikr muhdes kapı ber-vech-i muharrer lüzûmu olmayıp belki zarar-ı azîmi olmağla kemâfi’l-evvel seddolunmak bâbında kādısına hitâben emr-i âlî iltimâs ettikleri huzûr-ı âlîlerine i‘lâm olundu. Bâkī fermân hazret-i veliyyü’l-emrindir. Fî 6 Cumâdelûlâ sene [1]143.