Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 491 Hüküm no: 578 Orijinal metin no: [117a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küretünnühas kazası ahalisinden alınan para davasının meşru olmadığı Ma‘rûz. Kapıkethüdâsı İbrahim Beşe mübâşeretiyle Bâb Mahkemesi’ne ihzâr olunan İbrahim’den hasımları Ahmed ve İbrahim nâm kimesneler meclis-i şer‘de târih-i i‘lâmdan iki sene mukaddem mezbûr İbrahim Küretü’n-nuhâs voyvodası tarafından karyemize gelip ahâlîsini müsâdere tarîkiyle me’hûze ve bizi habs ve mütâlebe etmekle tahlîs-i girîbân için ahâlî taraflarından mezbûra bizim yedimiz ile yüz yirmi guruş verilmişidi hâlâ meblağ-ı mezbûru bize istirdâd eylesin deyü asâleten ve vekâleten da‘vâ ve mezbûr İbrahim cevâbında karye-i mezbûre ahâlîsi bir husûs için ücret nâmıyla bana ancak doksan guruş vermişler idi deyü meblağ-ı mezbûr cemî‘ ahâlîden olduğu müte‘ayyin ve karye-i mezbûre ahâlîsinin cümlesi ma‘lûmü’l-esâmî ve mahsûrü’l-eşhâs olmamağla taraflarından isbât-ı vekâlet ve ta‘yîn-i niyâbet mümkün olmadığından nâşî meblağ-ı mezbûrdan merkūmânın hisselerine isâbet eden mikdâr dahi nâ-ma‘lûm olup ol vechile tashîh-i da‘vâ ve tasvîr-i müdde‘â bulunmadığından da‘vâ-yı meşrûhalarını istimâ‘a imkân-ı şer‘î olmadığı mübâşirleri iltimâsıyla huzûr-ı âlîlerine i‘lâm olundu. Fermân men-lehü’l-emrindir. Fî 6 Cumâdelûlâ sene [1]143.