Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 494 Hüküm no: 584 Orijinal metin no: [118a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. At hamalları kethüdalığına Süleyman’ın tayini talebi Ma‘rûz. Sâdır olan fermân-ı âlîlerine imtisâlen İstanbul’da vâki‘ Langa ve Kumkapı ve Bahçekapısı ve Hasır iskelesi ve Odunkapısı ve Ayazma ve Çöplük iskeleleri ve Kapan-ı dakīk ve iskelesi ve Cebeali ve Balatkapısı at hamalları kethüdâları ve neferâtından mazbûtü’l-esâmî cemm-i gafîr Müslimîn ve cem‘-i kesîr ehl-i zimmet sâhib-i arzuhâl başkethüdâları Süleyman’ın bu ana gelince kat‘â kimesneye zulüm ve te‘addîsi olmayıp cümlesi evzâ‘ ve etvârından râzı ve hoşnûd oldukların her biri meclis-i şer‘de ba‘de’l-ihbâr bundan akdem mezbûr Süleyman’ın ref‘inden kethüdâlık-ı mezbûru kendiye berât ettiren İbrahim dahi kethüdâlık-ı mezbûrdan hüsn-i rızâsıyla kasr-ı yed ve fâriğ ve berâtını merkūm Süleyman’a def‘ ve teslîm etmeğin kethüdâlık-ı mezbûr merkūm İbrahim kasr-ı yedinden mersûm Süleyman üzerine yine kemâ-kân altmış dört akçe ekmeği mukābelesinde ibkā olunmak bâbında istid‘â-yı inâyet eyledikleri huzûr-ı âlîlerine i‘lâm olundu. Bu bâbda fermân hazret-i veliyyü’l-emrindir. Fî 7 Cumâdelûlâ sene [1]143.