Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 501 Hüküm no: 602 Orijinal metin no: [119a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halka zulmeden Değirmencioğlu Mehmed ile es-Seyyid Himmet’in Gediz’e gelmelerine izin verilmemesi talebi Ma‘rûz. Vilâyet-i Anadolu’da vâki‘ Gedüs (Gediz) kazâsı ahâlîsinden Hüseyin b. el-Hâc İbrahim ve el-Hâc Ali b. Mehmed ve Mustafa b. Mehmed ve Ali Bey b. Mehmed ve Mustafa b. İbrahim nâm kimesneler meclis-i şer‘de yine kazâ-i mezbûre ahâlîsinden nefs-i Gedüs (Gediz) sükkânından Değirmencioğlu Mehmed ve Gedikler nâm karye sükkânından es-Seyyid Himmet nâm kimesneler mahzarlarında mezbûrân Mehmed ve es-Seyyid Himmet ziyâde eşirrâdan oldukları cihetle nice müddetden berü İstanbul’da [119b] sâkinler olup bi-gayr-ı hakkın sükkân-ı vilâyetden kendi hâlinde kimesneleri zalemeye gamz ve tecrîm ve tağrîm ettirdiklerinden mâ‘adâ yine sükkân-ı vilâyetden ba‘zı kimesneleri diyâr-ı âhara nefy ve dâimâ ahâlî-i kazâyı bu misillü tecrîm ve tağrîm ve hetk-i ırz ettirmek âdet-i müstemirreleridir deyü mezbûrândan teşekkî ve mazmûnu min-külli’l-vücûh takrîrlerine muvâfık kazâ-i mezbûr nâibi es-Seyyid Ahmed Efendi imzâsıyla mümzâ ve hatmiyle mahtûm bir kıt‘a arz ve bi’l-cümle ahâlî kazâ imzâlarıyla mümzâ mahzar ibrâz ve mezbûrân Mehmed ve es-Seyyid Himmet ıslâh-ı nefs edince[ye kadar] vilâyetlerine gitmemek üzere istidâyı inâyet ettikleri bi’l-iltimâs huzûr-ı âlîlerine i‘lâm olundu. Fermân hazret-i veliyyü’l-emrindir. Fî 25 Cumâdelûlâ sene [1]143.