Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 506 Hüküm no: 616 Orijinal metin no: [120b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simkeşhane’deki halifelere müstakil dezgâh verilmesinin nizama uygun olmadığı Ma‘rûz. Mahmiye-i İstanbul’da Simkeşhâne’de kılabdancı tâ‘bir olunur ashâb-ı arzuhâl simkeş halîfeleri bundan akdem tâife-i mezbûrenin kethüdâları ve yiğitbaşıları ve sâir üstâdları ve ihtiyârları ile bi’d-defa‘ât murâfa‘a ve bizler üstâda hizmet edip destûr almış iken mezbûr üstâdlarımız bizlere müstakil destgâh vermeyip halîfelikde istihdâm ederler deyü da‘vâ eylediklerinde onlar dahi bizim destgâhlarımız mütemevvil olup beher mâh kârhânenin icâresini edâda taksîrât etmeyip mâl-ı mîrîyi iltizâm ve ta‘ahhüd ve mu‘temed olup min-külli’l-vücûh uhdesinden gelmeye kādir üstâdlara ta‘yîn ve onlardan biri fevt oldukda ehliyetli evlâdı var ise babası mahlûlünden destgâhı verilip evlâdı olmadığı sûretde san‘at-ı mezbûrede üstâd ve atîk halîfelerin müstehakkına verilmek üzere yedlerimizde hüccet-i şer‘iyyelerimiz olup nizâm verilip bu vech üzere Başmuhâsebe’ye kaydolunmuşdur deyü senedâtların ibrâz etmeleriyle mezbûr halîfeler mu‘ârazadan men‘ ve vech-i meşrûh üzere üstâdlar yedine müte‘addid i‘lâmlar verilip ve mûcebince üzerlerine fermân sâdır ve yedlerinde olan hüccet-i mezkûrenin dahi mazmûnu vech-i meşrûh üzere olduğu huzûr-ı âlîlerine i‘lâm olundu. Fermân hazret-i veliyyü’l-emrindir. Fî 9 Cemâziyelâhir sene [1]143.