Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 513 Hüküm no: 629 Orijinal metin no: [122a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yangın sonucuda iflas eden Yorgancı Mustafa’nın hapsinin meşru olmadığı Ma‘rûz. Derûn-ı arzuhâlde mezkûr Yorgancı Mustafa’nın cihet-i deyn-i şer‘iyyeden el-Hâc Mehmed nâm kimesneye yüz guruş ve İbrahim nâm kimesneye kırk iki buçuk guruş deyni olup bundan akdem ihrâk sebebi ile müflis ve mu‘dim ve fakīr olmağla mukaddemâ mezbûr el-Hâc Mehmed’e iki guruş ve mezbûr İbrahim’e yüzer akçe iktisâbından edâ etmek üzere her biri taksît ve te’cîl ettiklerinden sonra medyûn-ı mezbûr Mustafa meblağ-ı mukassat-i merkūmu dâyini mezbûr el-Hâc Mehmed’e bir vechile edâ etmemekle tekrar ma‘rifet-i şer‘le habsettirip hâlâ mahbûs olup lâkin üzerinde lâbis olduğu köhne libâsdan gayrı ism-i mâl ıtlâk olunur bir şeyi olmayıp fakīr ve müflis ve mu‘dim olduğu bî-garaz Müslimînden es-Seyyid İsmail ve Mehmed Çelebi ve Ali Ağa ve Ahmed Çelebi ve Salih Çelebi ve İbrahim Çelebi ve Ali Ağa ve el-Hâc Osman ve Ahmed ve Mustafa ve Ya‘kub nâm kimesneler dâyini mezbûr el-Hâc Mehmed muvâcehesinde alâ-tarîkı’ş-şehâde haber verdiklerinde dâyin-i mezbûr el-Hâc Mehmed dahi asârına beyyinesi olmamağla habsden ıtlâk ve iflâsına ba‘de’l-hükm mezbûr Mustafa’nın yesârı şer‘an sâbit ve zâhir olmadıkça habsi meşrû‘ olmadığı huzûr-ı âlîlerine i‘lâm olundu. Fî 12 Cumâdelâhire sene [1]143.