Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 518 Hüküm no: 641 Orijinal metin no: [123a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Güzelkebir köyündeki câminin tevliyeti konusunda açılan davanın meşru olmadığı Ma‘rûz. Huzûr-ı âlîlerinde ma‘kūd meclis-i şer‘-i şerîfde ashâb-ı arzuhâlden es-Seyyid Mehmed derûn-ı arzuhâlde mezkûr Hocazâde es-Seyyid el-Hâc Mehmed mahzarında medîne-i Karahisâr-ı şarki’de Güzelkebir nâm karyede vâki‘ merhûm Ebu’l-feth Sultan Mehmed Hân binâ eylediği câmi‘-i şerîf evkāfının yevmî iki akçe vazîfe ile tevliyeti berât-ı âlîşân ile babam müteveffâ Musa’nın üzerinde iken merkūm es-Seyyid el-Hâc Mehmed, oğlu es-Seyyid Ahmed’e babam ref‘inden üzerine berât ettirip ve babam fevtinden sonra mezbûr es-Seyyid Ahmed ref‘inden bana ve üç nefer kız karındaşlarıma tevcîh olunup ba‘dehû bizim ref‘imizden yine mezbûr es-Seyyid Ahmed’e tevcîh ve mezbûr es-Seyyid Ahmed’in kasr-ı yedinden babası merkūm es-Seyyid el-Hâc Mehmed’e tevcîh olunmuşidi. Mücerred tevliyet-i merkūmeye babam mütevellî-i mezbûr Musa hayâtından berât-ı âlîşân ile bir müddet mutasarrıf olduğu hasebiyle tevliyet-i merkūme mezbûr es-Seyyid el-Hâc Mehmed [123b] ref‘inden bizlere tevcîh olunması taleb ederiz deyü da‘vâya tasaddî edip lâkin tevliyet-i merkūme müdde‘î-i mezbûrların takrîrleri üzere kendilerin babasının meşrûtası olmayıp ve kānûnen imâmet ve hitâbet misillü evlâda verilen cihâddan dahi olmamağla müdde‘î-i mezbûrların da‘vâları meşrû‘a olmadığından mâ‘adâ medîne-i mezbûre kādısı mezkûr es-Seyyid el-Hâc Mehmed’in istihkākını ve müdde‘îlerin adem-i istihkāklarını arz etmekle müdde‘î-i mezbûrları bî-vech mu‘ârazadan men‘ olunmağın mûcebince mezbûr es-Seyyid Hacı Mehmed’e hükm-i hümâyûn sa‘âdet-makrûn iltimâs eylediği huzûr-ı âlîlerine i‘lâm olundu. Bâkī fermân hazret-i veliyyü’l-emrindir. Fî 17 Cemâziyelâhir sene [1]143.