Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 266 Hüküm no: 375 Orijinal metin no: [55a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Patrik Papapos’un borcu olduğu Husûs-ı âti’l-beyânı[n] mahallinde tahrîr olunması iltimas olunmağın savb-ı şer‘den Mevlânâ Ali Efendi irsâl olundukda ol dahi hadâik-ı sultânîden hâsbağçede Sinan Paşa köşkü kurbünde vâki‘ köşkün bekçisi odasına varıp zeyl-i kitâbda mastûrü’l-esâmî olan Müslimîn huzûrlarında akd-i meclis-i şer‘-i şerîf eyledikde, mahmiye-i İstanbul’da Nasârâ tâifesine hâlâ patrik olan Papapos v. Yani nâm râhib meclis-i şer‘-i hatîr-i lâzımü’t-tevkīrde hâlâ bostancılar kâtibi olan işbu bâ‘isü’l-kitâb fahrü’l-emâcid ve’l-ekârim Hasan Efendi b. Ahmed mahzarında ikrâr-ı tâm ve takrîr-i kelâm edip işbu târîh-i kitâb günü mûmâ-ileyh Hasan Efendi yedinden iktirâz [ve] tesellüm eylediğim bin kırk kıt‘a riyâlî guruşu târîh-i mezbûrdan on ay tamamına değin müeccel ve mev‘ûd olmak üzere iştirâ ve tesellüm eylediğim benefşe sâye çuka kaplı bir samur kürk bahâsından beş yüz guruş ki cem‘an bin beş yüz riyâlî guruş zimmetimde mûmâ-ileyh Hasan Efendi’ye lâzımü’l-edâ ve vâcibü’l-kazâ deynim vardır dedikde, mukırru mezbûrun ikrâr-ı meşrûhunda el-mukarru lehü’l-merkūm Hasan Efendi dahi vicâhen tasdîk ve şifâhen tahkīk edip meblağ-ı mezbûr bin beş yüz guruşun cemî‘sine hâzirûn bi’l-meclis bostancıbaşı hasekilerinden Yusuf Bey b. Şa‘ban nâm bostancı ve Tavşan Yani v. Dimo nâm zimmî ve Ereğli metrepolidi Matadyos v. Yorgi ve Kapıdağı metrepolidi Andimos v. Azgori ve İznikmid metrepolidi Kirilos v. Yani ve Gemlik metrepolidi Vergorb v. Manol ve Kadıköyü metrepolidi Voril v. Yorgi ve Bursa metrepolidi Vekelem v. Yani ve Edirne metrepolidi Noftoz v. Kostantin ve Marmara metrepolidi Kermiye v. Hristosderi ve Varna metrepolidi Ankimos v. Kostantin ve Bahçe-i Müslim? [metrepolidi] Lazgari v. Manol nâm râhibler emr [ve] kabûlü hâvî kefâlet-i sahîha-i şer‘iyye ile kefîl bi’l-mâl olduklarından sonra bi-tarîk-i mezbûr Papapos meblağ-ı mezbûr bin beş yüz guruşa mahsûb olmak üzere kendi ebniyemizde taht-ı nezâretimde olan medîne-i Galata’da Nerdümanbaşı kurbünde ve bostanlar kurbünde olan kenîselerden ve Hızırilyas kenîsesinden mahmiye-i İstanbul Ayakapısı’nda vâki‘ kenîseden bana âid olan mahsûlâtı ahz u kabza merkūm Yusuf Bey’i cânibimden vekîl ve nâib-i menâb nasb ve ta‘yîn eyledim dedikde ol dahi vech-i mübeyyen üzere vekâlet-i mezbûreyi kabûl ve merâsimini edâya müte‘ahhid olduğunu mevlânâ-yı mezbûr mahallinde tahrîr ba‘dehû meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Tahrîren fi’l-yevmi’r-râbi‘ min-Recebi’l-mürecceb li-sene erba‘a ve sittin ve elf. Şuhûdü’l-hâl: Ali Ağa b. Mehmed, İbrahim Ağa b. Durak, Hüsameddin b. Mehmed, Ali el-bostânî, Mehmed Bey bostânî, İbrahim Çelebi b. Davud, Süleyman b. Mustafa, Rıdvan b. Abdullah, el-Hâc Şa‘ban b. Ahmed, Muharrem b. Abdullah, Ramazan b. Yusuf, Ali Beşe b. Abdullah çukadâr, Halil b. Lütfi ve gayruhum mine’l-huzzâr.