Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 267 Hüküm no: 376 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. İbrahim ile Mehmed b. Mustafa’nın muhalaa yoluyla boşandıkları Mahmiye-i İstanbul’da Eminbey Mahallesi’nde sâkine Safiye bt. İbrahim nâm hatun tarafından vech-i âtî üzere hul‘a ve ibrâ-yı zimmete vekîl olup vekâleti hasm-ı câhid-i şer‘î mahzarında mezbûrenin zâtını ma‘rifet-i şer‘iyye ile ârifân olan Pîrî Beşe b. Hüseyin ve Ramazan b. Yusuf şehâdetleri ile şer‘an sâbite olan li-ebeveyn karındaşı Fâtıma nâm hatun mahfil-i kazâda müvekkilesi mezbûre Safiye’nin zevci işbu bâ‘isü’l-kitâb Mehmed b. Mustafa mahzarında bi’l-vekâle ikrâr-ı tâm ve takrîr-i kelâm edip müvekkilem mezbûre Safiye’nin ma‘kūdün-aleyh olup zevci mezbûr Mehmed zimetinde mütekarrer olan iki bin iki yüz akçe mehr-i müecceli ve nafaka-i iddet ve meûnet-i süknâsı üzerine ve müvekkile-i mezbûrenin olup hâlâ mezbûr Mehmed’in yedinde olan beş yasdık ve iki minder ve bir döşek ve üç sahan ve bir bakır sini ve orta keçesi ve iki çarşeb ve bir yorgan üzerine ve mezbûr Mehmed’in firâşından hâsıl olan sadriye kızı Fâtıma nâm sagīreyi târîh-i kitâbdan üç sene tamamına değin mezbûr Mehmed’den nafaka ve kisve taleb etmeksizin terbiye ve iskân etmek üzerine ve müvekkile-i mezbûre zevci merkūm Mehmed’den hâmil olmağla müddeti münkaziye olup haml hayyen mütevellid oldukda yedi sene tamamına değin merkūm Mehmed’den müddet-i rızâ‘at ücret ve müddet-i rızâ‘dan sonra kezâlik nafaka ve kisve taleb etmeksizin müvekkil-i mezbûr imsâk etmek üzerine zevci merkūm Mehmed ile vekâletim hasebiyle muhâla‘a-i sahîha-i şer‘iyye ile muhâla‘a eyledim dedikde mezbûr Mehmed dahi muhâla‘a-i mezbûru kabûl eyledikden sonra yine mezbûre Fâtıma vekâleti hasebiyle vekâleten ve mezbûr Mehmed asâleten târîh-i kitâbete gelinceye değin hukūk-ı zevciyete müte‘allık da‘vâdan dahi birbirini ibrâ-i âmm-ı kātı‘u’n-nizâ‘ ile ibrâ ve ıskāt etmeğin mâ-hüve’l-vâki‘ gıbbe’t-taleb ketb ü sebt olundu. Fî-gurreti şehri Recebi’l-mürecceb li-sene erba‘a ve sittin ve elf. Şuhûdü’l-hâl: Ahmed Beşe b. Abdullah, Mustafa Beşe b. İbrahim, Hasan Beşe b. Mehmed, İbrahim Çelebi b. Davud ve gayruhum.