Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 527 Hüküm no: 663 Orijinal metin no: [125b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Filyos’un Artin ile olan veraset davasında haksız olduğu Ma‘rûz. Dâ‘î-i devlet-i aliyyeleridir ki derûn-ı arzuhâlde mezkûr Filyos zimmî meclis-i şer‘de bundan akdem hâlik olan Asvador nâm zimmînin güveyisi ve terekesine vâzı‘u’l-yed olan sâhib-i arzuhâl Artin muvâcehesinde ben hâlik-i mezbûrun ammi oğlu ve usûbet-i nesebiye cihetinden vârisi olmamla terekesinden hisse-i irsiyyemi taleb ederim deyü da‘vâ eyledikde merkūm Artin cevâbında merkūm Filyos husûs-ı mezkûru mukaddemâ bir def‘a dahi da‘vâ ve da‘vâ-yı mezkûrunda kâzib ve mübtil idiği lede’ş-şuhûd ikrâr ve husûs-ı mezkûra müte‘allika âmme-i da‘vâdan hâlik-i merkūmun veresesini ibrâ ve iskāt edip yedlerine hüccet dahi vermişdir deyü def‘ ve takrîrine muvâfık bir kıt‘a hüccet ibrâz ve mazmûnu şuhûd-ı udûlden Vâlidehanı’nda sâkin tüccâr-ı zevi’l-iktidârdan Ömer Ağa b. el-Hâc Osman ve el-Hâc Ahmed b. el-Hâc Mahmud nâm kimesneler ile isbât etmeğin mûcebince mezbûr Filyos bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fermân men-lehü’l-emrindir. Fî 29 C sene [1]143.