Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 528 Hüküm no: 664 Orijinal metin no: [126a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Oda icaresi davasında sulh olduğu Ma‘rûz. Derûn-ı arzuhâlde mastûrü’l-ism Markos zimmî hasımları sâhib-i arzuhâl Abdülbâki ve zevcesi Fâtıma ile murâfa‘a-i şer‘ olduklarında mezbûr Markos’un bi’l-icâreteyn taht-ı tasarrufunda olup Hoca Hanı’nda olan odasını mezbûr Abdülbâki ile merkūme Fâtıma’ya beher şehri bir guruşa îcâr ve merkūmân dahi ber-vech-i muharrer istîcâr ve kabûl edip on iki ay mutasarrıf olduğu ecilden müctemi‘ olan on iki guruş icâre da‘vâsından muslihûn tavassutuyla yedi guruş bedel-i makbûza sulh mâ‘adâya müte‘allika âmme-i da‘vâdan merkūm Markos mezbûrânın zimmetlerini ibrâ ve iskāt eyledikde mezbûrân dahi husûs-ı mezkûra ve sâire müte‘allika âmme-i da‘vâdan merkūm Markos’un zimmetini ibrâ ve iskāt edip kat‘-ı nizâ‘ eyledikleri ba‘de’t-tescîl huzûr-ı âlîlerine i‘lâm olundu. Bâkī emr men-lehü’l-emrindir. Fî-gurreti Receb sene [1]143.