Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 274 Hüküm no: 387 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Annesi vefât eden Emine bt. Hüseyin üzerine dedesinin vasi tayini Mahmiye-i İstanbul’da Kabasakal Mahallesi’nde vâki‘ Âişe Sultan sâkini vefât eden Hüseyin Bey b. Abdullah nâm kimesnenin sulbiye kızı Emine bt. Hüseyin nâm sagīrenin tesviye-i umûruna cânib-i şer‘den bir vasî nasb olunmak lâzım olmağın yine sagīre-i mezbûrenin ceddi işbu bâ‘isü’l-kitâb İbrahim Bey b. Abdullah her vechile vesâyet-i mezbûreye ehil ve hizmete kādir olmağın hâkim-i muvakki‘ sadr-ı kitâb tûbâ-lehû ve hüsnü-meâb hazretleri mezbûr İbrahim Bey’i sagīre-i mezbûrenin üzerine vasî nasbedip ol dahi vesâyet-i mezbûreyi kabûl ve hizmet-i lâzımesini edâya müte‘ahhid oldukdan sonra sagīre-i mezbûreye ve hizmetinde olan câriyesi Badısaba bt. Abdullah’ın nafaka ve kisve vesâir levâzım-ı zarûriyelerine müteveffâ-i mezbûrâna intikāl eden mâldan hâkim-i müşârun-ileyh lâ-zâle müşârun-ileyh hazretleri vasiyy-i mezbûr talebiyle yevmî altı akçe farz ve takdîr edip vasiyy-i mezbûra meblağ-ı mefrûzu mezbûretâna harc ve sarfa <> hîn-i zarûretde istidâne ve lede’z-zafer ric‘ate izin vermeğin mâ-hüve’l-vâki‘ gıbbe’t-taleb kaydolundu. Fi’t-tâsi‘ aşer min-Recebi’l-ferd li-sene erba‘a ve sittin ve elf. Şuhûdü’l-hâl: el-Hâc Yusuf b. Abdullah, Dilaver Bey b. Abdullah, İbrahim b. Abdullah, Pîrî Bey b. Hüseyin kāimmakām, Ali Beşe b. Mehmed çukadâr, İbrahim Çelebi b. Davud er-ressâm, Rıdvan Beşe b. Abdullah, Hüseyin b. Mehmed, el-Hâc Şa‘ban b. Mehmed ve gayruhum mine’l-huzzâr.