Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 64 Hüküm no: 56 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fofona bt. Nikola’nın mahzenini damadı Kayaoğlu Kostandi’ye sattığı Medîne-i Üsküdar’a muzâfe Adalar nâhiyesine tâbi‘ Ada-i kebîr karyesinde mütemekkine Fofona bt. Nikola Nasrâniye tarafından ber-vech-i âti’l-beyanda vekîl olduğu şahsı vech-i şer‘î [üzere] ârifân Tefani v. Togodoş ve Manolaki v. Dimitraki ve Yamandaki v. Panayot zimmîler şehâdetleriyle sâbitü’l-vekâlesi Malamata v. Yamandi zimmî meclis-i şer‘-i hatîrde dâmâdı işbu râfi‘ü’r-rakīm Kayaoğlu Kostanti v. Yorgaki zimmî muvâcehesinde bi’l-vekâle ikrâr ve takrîr-i kelâm edüp müvekkilem mesfûrenin yedinde mülkü olup karye-i mezbûrede vâki‘ bir tarafı Nikolaki menzili ve bir tarafı Yamandi dükkânı ve bir tarafı Deriko dükkânı ve bir tarafı tarîk-i hâs ile mahdûd bir bâb <> mülk mahzeni tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müşterî-i merkūma yüz guruşa bey‘ u teslîm ve temlîk edüp ol dahi ber-vech-i muharrer iştirâ ve tesellüm ve temellük ve kabz u kabûl eyledikden sonra semeni olan meblağ-ı mezkûr yüz guruşu müvekkilem mesfûre Fofona Nasrâniye dâmâdı müşterî-i merkūm Kostanti zimmî yedinden tamâmen ahz ü kabz eyleyüp fîmâ-ba‘d mahzen-i mahdûd-ı mezkûrda vechen mine’l-vücûh ve sebeben mine’l-esbâb müvekkilem mezbûre Fofona Nasrâniyenin kat‘â alâka ve medhali kalmayup dâmâdı müşterî-i merkūm Kostanti zimmînin mülk-i müşterâsı ve hakk-ı sırf-ı sahîhi olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ışrîn Recebi’l-ferd li-sene tis‘a ve seb‘în ve mi’ete ve elf. Şuhûdü’l-hâl: Kayseriyeli Mehmed Ağa, Ali Ağa b. Süleyman, Mehmed Usta, Çolak Ali Beşe, Ahmed Efendi. Şişman Andon, ...? Kara Yorgaki, Aci Dimitraki v. Yani, Çakıcıoğlu Kostanti, Panayotaki, Berber Yasef.