Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 65 Hüküm no: 57 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kardeş olan Markos, Kitagos ve Meryem’in ortak sahip oldukları ev hisselerini kız kardeşleri Margarit’e sattıkları Medîne-i Üsküdar’a muzâfe Adalar nâhiyesine tâbi‘ Kartal kasabasında mütemekkin Markos ve Kitagos veledey Agop ve li-ebeveyn kız karındaşları olup şahsı vech-i şer‘î üzere mu‘arrefe olan Meryem Nasrâniye her biri meclis-i şer‘-i hatîrde ve li-ebeveyn kız karındaşları olup şahsı kezâlik mu‘arrefe olan bâ‘isetü’l-vesîka Margarit Nasrâniye muvâcehesinde ikrâr ve takrîr-i kelâm edüp akd-i câ’i’z-zikrlerin sudûruna değin yedimizde mülk-i mevrûsumuz olup kasaba-i mezbûrede vâki‘ bir tarafı el-Hâc Mustafa Ağa bekâr odası ve iki tarafı tarîk-i cadde arsası ve bir tarafı tarîk-i âm ile mahdûd tahtânî bir bâb oda mülk bekâr odası altı sehim i‘tibârıyla ikişer sehmi mesfûrân Markos ve Kitagos zimmînin ve bir sehmi mesfûre Meryem Nasrâniyenin olup ve bir sehmi dahi müşterî-i mersûme Margarit Nasrâniyenin olmağla el-hâletü hâzihi oda-i mezkûrda olan ve zikr olunan sihâmlarımızı tarafeynden îcâb ve kabûlü hâvî şurût-ı müfsideden [ârî] bey‘-i bâtt-ı sahîh-i şer‘î ile müşteriye-i mesfûre Margarit Nasrâniyeye yüz otuz guruşa bey‘ u teslîm ve temlîk eylediğimizde ol dahi ber-vech-i muharrer iştirâ ve tesellüm ve temellük ve kabûl eyledikden sonra semeni olan meblağ-ı mezkûr yüz otuz guruşu bi-kadri’l-hısas tamâmen her birimiz müşteriye-i mesfûre yedinden tamâmen ahz ü kabz edüp fîmâ-ba‘d oda-i mahdûd-ı mezkûrda olan sihâm-ı mezkûremizden vechen mine’l-vücûh ve sebeben mine’l-esbâb bizim kat‘â alâka ve medhalimiz kalmayup oda-i mezkûrun mecmû‘u ırsen ve şirâen mülk-i mahzı olmuşdur dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 Recebi’l-ferd sene [1]179 Şuhûdü’l-hâl: Ahmed Efendi, Nalband İbrahim Beşe, Berber Memiş Beşe, Duhâni Mehmed Beşe, İshak Beşe. Yazıcı Kirkor, Bogos v. Bedros, Yağmuroğlu Aci Mikail, Aci Baron v. Kabril, Ohan v. Marat, İsayi v. Tamas, Terzi Kevork, Terzi Avakim.