Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 595 Hüküm no: 814 Orijinal metin no: [146a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tulumbacıbaşı Gerçek Davud’un yanındakilerin vergi talebiyle rencide olunmamaları Düstûr-ı mükerrem müşîr-i müfahham nizâmü’l-âlem müdebbir-i umûrü’l-cumhûr bi’l-fikri’s-sâkıb mütemmim-i mehâmmi’l-enâm bi’r-re’yi’s-sâib mümehhidi bünyânü’d-devlet ve’l-ikbâl müşeyyid-i erkânü’s-sa‘âdet ve’l-iclâl el-mahfûf bi-sunûfi avâtıfi’l-meliki’l-a‘lâ Âsitâne-i sa‘âdetimde sadâret-i uzmâ ve vekâlet-i kübr[â] kāimmakāmı vezîrim ( ) Paşa -edâmallâhu te‘âlâ iclâlehu- ve akzâ kuzâti’l-Müslimîn evlâ vülâti’l-muvahhidîn ma‘deni’l-fazl ve’l-yakīn râfi‘-i a‘lâmü’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtas bi-mezîd-i inâyeti’l-meliki’l-Mu‘în Mevlânâ İstanbul kādısı -zîdet fezâiluhû- tevkī‘-i refî‘-i hümâyûn vâsıl olıcak ma‘lûm ola ki; kıdvetü’l-emâsil ve’l-akrân Tulumbacıbaşı Davud-ı Gerçek -zîdet kadruhu- Ordu-yı hümâyûnuma arzuhâl edip tulumbacılık ve kazık çakmaları için lüzûmu olup iktizâ eden demir âlâtları birkaç seneden berü kendileri hânelerinde nice derd ve meşakkat ile gösterip ve öğredip âlât-ı demirleri işlendirdiği Vartan oğlu Artin [ve] kalfası Menas nâm zimmîler âlât-ı hizmet-i mezkûrda olup edâ-yı hizmet-i pâdişâhîde olmalarıyla bundan akdem Divriği kazâsı ahâlîlerinden bazıları vilâyetlerinde iskânı fermân olundukda iki nefer zimmî mesfûrlara iskân tekâlifi ile rencîde olunmayalar deyü yedlerine emr-i şerîf verilip mesfûrlara bir türlü te‘addî îcâb etmez iken ahâlî-i <> mezbûrdan bazıları kāni‘ olmayıp vâkı‘a olan kömür akçesi tekâlifinde sizler dahi verin deyü mesfûrları rencîde ve hizmet-i merkūmun ta‘tîline bâ‘is olmağla tekrar mesfûrların ol vechile tekâlif talebiyle rencîdeleri men‘ ve def‘ olunmak için emr-i şerîfim verilmek bâbında istid‘â-yı merhamet eyledikleri ecilden imdi vech-i meşrûh üzere amel olunmak bâbında fermân-ı âlîşânım sâdır olmuşdur. Buyurdum ki hükm-i şerîfim vardıkda bu bâbda sâdır olan emrim üzere amel edip dahi vech-i meşrûh üzere mesfûrân iki nefer zimmîler Âsitâne-i sa‘âdet’de tulumbacıbaşı mûmâ-ileyhin yanında mîrî hizmetde olmalarıyla mukaddemâ verilen emr-i âlîşânıma mugāyir ol vechile tekâlif talebiyle rencîde ve ta‘cîz ettirmeyesiz şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sâdis ve’l-ışrîn şehr-i Safer sene selâse ve erba‘în ve mi’e ve elf. Be-makām-ı sahrâ-yı Üsküdar.