Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 596 Hüküm no: 815 Orijinal metin no: [146a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tayin olunan çukadârlara engel olunmaması Akzâ kuzâti’l-Müslimîn evlâ vülâti’l-muvahhidîn ma‘deni’l-fazl ve’l-yakīn râfi‘-i a‘lâmü’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtas bi-mezîd-i inâyeti’l-meliki’l-Mu‘în Mevlânâ İstanbul kādısı -zîdet fezâiluhû- tevkī‘-i refî‘-i hümâyûn vâsıl olıcak ma‘lûm ola ki; Dergâh-ı mu‘allâm yeniçerileri ocağı tarafından sadrâzamım kapısında muhzırlık hizmetinde olan kıdvetü’l-emâcid ve’l-a‘yân İsmail -zîdet mecdühû- Ordu-yı hümâyûnuma arzuhâl edip İstanbul’da vâki‘ mahkemeler çukadârlıklarının kānûn-ı kadîm üzere azl ve nasbı mûmâ-ileyhe müveffaz olmağla sefer ve hazerlerde tarafından nasb ve ta‘yîn eylediği adamlara zabt ettirilip Âsitâne-i sa‘âdetim kāimmakāmı yanlarında olan ocak muhzırı vekîllerinin ve âharın husûs-ı mezbûrda alâka ve medhali olmayıp mûmâ-ileyhin tarafından nasb ve ta‘yîn eylediği adamlar zikrolunan mehâkimde çukadârlık hizmetlerinde iken hâlâ seferli olduğundan Âsitâne-i sa‘âdetimde ocak muhzırı vekîli tarafından ve taraf-ı âhardan mehâkim-i mezbûre çukadârlıkları’çün ta‘yîn eylediği adamları biz azl ve nasbederiz deyü müdâhale olunduğun bildirip mûmâ-ileyhin tarafından nasbeylediği adamlara zabt ettirilip hilâf-ı kānûn âhara müdâhale ettirilmemek bâbında emr-i şerîfim ricâ eylediği ecilden vech-i meşrûh üzere amel olunmak bâbında fermân-ı âlîşânım sâdır olmuşdur. Buyurdum ki vusûl buldukda bu bâbda sâdır olan fermân-ı celîlü’l-kadrim mûcebince amel, dahi sen ki mevlânâ-yı mûmâ-ileyhsin vech-i meşrûh üzere zikrolunan mahkemeler çukadârlığını mûmâ-ileyhin tarafından nasb ve ta‘yîn eylediği adamlara zabt ettirip hilâf-ı kānûn Âsitâne-i sa‘âdet’de ocak muhzırı vekîli tarafından ve taraf-ı âhardan biz azl ve nasbederiz deyü dahl ü ta‘arruz ettirmeyip mazmûn-ı emr-i şerîfim ile amel edesiz şöyle bilesiz alâmet-i şerîfe i‘timâd kılasız. Tahrîren fî-evâhiri Saferi’l-hayr sene selâse ve erba‘în ve mi’e ve elf. Be-makām-ı sahrâ-yı Üsküdar.