Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 596 Hüküm no: 816 Orijinal metin no: [146b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çatkıcı ve bürüncekçi esnafından kanuna mugayir vergi alınmaması Akzâ kuzâti’l-Müslimîn evlâ vülâti’l-muvahhidîn ma‘deni’l-fazl ve’l-yakīn râfi‘-i a‘lâmü’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtas bi-mezîd-i inâyeti’l-meliki’l-Mu‘în Mevlânâ İstanbul kādısı -zîdet fezâiluhû- tevkī‘-i refî‘-i hümâyûn vâsıl olıcak ma‘lûm ola ki; çatkıcı ve bürüncekçi esnâfı dîvân-ı hümâyûnuma arzuhâl edip mukaddemâ hîn-i fetihden berü metâ‘larından bir akçe resm alınagelmiş değil iken sâbıkā maktûl vezîr İbrahim Paşa’nın zamânında ihdâs ve ve birkaç senden berü rüsûm-ı tamga-yı akmişe mukāta‘ası emînleri beher mâh üç bin beş yüz akçe alıp gadr murâd eylediğin bildirip resm-i mezbûr muhdes olmağla mukāta‘a-i merkūm emînleri taraflarından mütâlebe olunmamak için emr-i şerîfim ricâ eyledikleri ecilden Hazîne-i âmiremde mahfûz olan Başmuhâsebe defterlerine nazar olundukda İstanbul’un akmişe ve sandal rüsûmu mukāta‘ası hâssa cerrâhbaşısı Süleyman -zîde fazluhu-nun mâlikâne uhdesinde olduğu ve İstanbul’da nesc olunan emti‘a bin yüz otuz iki senesinde vaz‘ olunan resm-i tamgadan çatkıcı ve bürünceğine bir nesne ta‘yîn olunmayıp kaydolunan rüsûm-ı tamgaya dâhil olmadığı derkenâr olundukda mezbûrlardan beyhûde resm talebiyle rencîde olunmamaları’çün mahalline kayd ve emr-i şerîfim verilmek bâbında iftihârü’l-ümerâ ve’l-ekâbir bi’l-fi‘il başdefterdârım Ali -dâme ulüvvühû- arz ve telhîs etmeğin imdi telhîsi mûcebince amel olunmak bâbında fermân-ı âlîşânım sâdır olmuşdur. Buyurdum ki hükm-i şerîfim vardıkda bu bâbda sâdır olan emrim üzere amel edip dahi resm-i mezbûr muhdes olmağın mezbûrlar dahi beyhûde resm talebiyle rencîde olunmamak için mahalline kaydolunmağla mugāyir-i emr-i âlîşân mukāta‘a-i merkūm emînleri tarafından resm talebiyle rencîde ve te‘addî ettirmeyesin şöyle bilesin alâmet-i şerîfe i‘timâd kılasın. Tahrîren fi’l-yevmi’l-hâmis ve’l-ışrîn min-şehri Rebî‘i’l-âhir li-sene selâse ve erba‘în ve mi’e ve elf. Be-makām-ı Kostantıniyye el-mahmiyye.