Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 597 Hüküm no: 817 Orijinal metin no: [146b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karadeniz iskelelerinden buğday getiren geminin Boğaziçi’nde Hasankalfa’daki yerine yanaşmasına engel olunmaması Mîrî peksimetçi fermânı. Akzâ kuzâti’l-Müslimîn evlâ vülâti’l-muvahhidîn ma‘deni’l-fazl ve’l-yakīn râfi‘ân a‘lâmü’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtas bi-mezîd-i inâyeti’l-meliki’l-Mu‘în İstanbul ve Galata kādıları -zîdet fezâiluhûmâ- tevkī‘-i refî‘-i hümâyûn vâsıl olıcak ma‘lûm ola ki; peksimetçibaşı olan el-Hâc Nureddin -zîde kadruhu- dîvân-ı hümâyûnuma arzuhâl edip Tersâne-i âmiremden donanma-yı hümâyûnum levendâtının nân ve peksimetleri tabhına mutasarrıf ve kendi mâlıyla bir kıt‘a sefînesi Karadeniz iskelelerinden hınta mübâya‘a için Âsitâne’ye nakli için mürûrunda Boğaziçi’nde Hasankalfa nâm mahalde peksimet fırınları iskelesine naklolunması için kimesne muhâlefet etmemek üzere bundan akdem emr-i şerîf-i âlîşân sâdır olmuş iken bu def‘a kapan nâibleri olanlar sefîne-i mezbûre geldikde mahal yerine yanaşdırmayıp mümâna‘at üzere olmalarıyla mukaddemâ sâdır olan emr-i celîlü’l-kadrim mûcebince sefîne-i mezbûr Hasankalfa nâm mahalde peksimet fırını iskelesine yanaştırılıp kimesne müdâhale etmemek üzere emr-i şerîfim verilmek ricâsına istid‘â-yı inâyet etmekle mîrî kalyonlar peksimetçibaşısı olup kendi sefîne ve kendi mâlıyla mübâya‘a eylediği hınta Boğaziçi’nda Hasankalfa nâm mahalde olan fırına yanaşmasına kimesne mümâna‘at eylememek ve şimdi bazıları zikrolunan sefînenin yanaşmasına mümâna‘at etmeleriyle hilâf-ı fermân hareket ve te‘addîleri men‘ ve def‘ ve merkūmun kendi akçesiyle mîrî peksimet için mübâya‘a eylediği zahîre sefînesinin yanaşmasına mümâna‘at olunmamak üzere emr-i şerîfim verilmek bâbında iftihârü’l-ümerâ ve’l-ekâbir bi’l-fi‘il başdefterdârım Ali -dâme ulüvvühû- arz ve telhîs etmekle imdi telhîsi mûcebince amel olunmak bâbında fermân-ı âlîşânım sâdır olmuşdur. Buyurdum ki hükm-i şerîfim vardıkda bu bâbda sâdır olan emrim üzere amel edip dahi vech-i meşrûh üzere zikrolunan mahallere merkūmun kendi mâlıyla mîrî peksimet için mübâya‘a eylediği zahîre sefînesinin yanaşmasına hilâf-ı fermân hareket ve te‘addîlerin men‘ ve def‘ edip kimesneye rencîde ve te‘addî ettirmeyesin şöyle bilesin alâmet-i şerîfe i‘timâd kılasın. Tahrîren fi’l-yevmi’s-sâmin ve’l-ışrîn min-şehri Rebî‘i’l-âhir sene selâse ve erba‘în ve mi’e ve elf. Be-makām-ı Kostantıniyye el-mahrûse.