Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 599 Hüküm no: 819 Orijinal metin no: [147a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman’ın Usta Osman’ın yerine barutçu tayin olunduğu Barutçu esnâfından işbu râfî‘-i tevkī‘-i refî‘ü’ş-şân-ı hâkānî Süleyman -zîde kadruhu- dîvân-ı hümâyûnuma arzuhâl edip barutçu ustalarından kârhâne sâhibi ve kendinin ustası Usta Osman fevt olup kârhânesi mahlûl olmağla kendiye verilmek bâbında inâyet ricâ etmeğin barutçu hırfetinin kethüdâsı ve yiğitbaşısı ve hırfet-i mezbûre erbâbından on beş nefer müseccelü’l-esâmî kimesneler meclis-i şer‘de kadîmden berü barutçu ustalarından biri vefât eylediğinde elinde ola[n] kârhânesi hizmetinde mevcûd bulunan pîr-perver halîfesine verilmek beynlerinde de’b-i kadîm olup müteveffâ-i mezbûr Osman’ın hîn-i vefâtına değin mezkûr Süleyman pîr-perver ve kârhâne-i mezbûreye ehil halîfesi olmağla de’b-i kadîm üzere müteveffâ-i mezbûrun yerine barutçu nasb ve tevcîh ve yedine berât-ı şerîf-i âlîşânım verilmek bâbında istid‘â-yı inâyet eylediğin İstanbul kādısı Bâb nâibi Lütfullah -zîde ilmühû- i‘lâm etmekle i‘lâmı mûcebince tevcîh ve nasb ve ta‘yîn olunmak bâbında fermân-ı âlîşânım sâdır olmağın hakkında mezîd-i inâyet-i pâdişâhânem zuhûra getirip mevlânâ-yı merkūmun i‘lâmı ve bin yüz kırk üç senesi Cemâziyye’l-evveli’nin beşinci günü târihiyle müverrah verilen ruûs-ı hümâyûnum mûcebince bu berât-ı hümâyûn izzet-makrûnu verdim ve buyurdum ki mezbûr Süleyman -zîde kadruhu- varıp müteveffâ-i merkūm ustası yerine kârhâne-i mezbûrede barutçu olup hizmet-i lâzımesin edâ eyledikden sonra barutçuluğuna efrâd-ı âferîdeden hiç ferd dahl ü ta‘arruz kılmayalar şöyle bileler alâmet-i şerîfe i‘timâd kılalar. Tahrîren fi’l-yevmi’s-sâbi‘ aşer min-şehri Cumâdelûlâ li-sene selâse ve erba‘în ve mi’e ve elf. Be-makām-ı Kostantıniyye el-mahrûse.