Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 604 Hüküm no: 823 Orijinal metin no: [149a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’a kasaplık için getirilen sığırların vergisi tahsil olunmadıkça kasaplara dağıtılmaması Akzâ kuzâti’l-Müslimîn evlâ vülâti’l-muvahhidîn ma‘deni’l-fazl ve’l-yakīn râfi‘-i a‘lâmü’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtas bi-mezîd-i inâyeti’l-meliki’l-Mu‘în Mevlânâ İstanbul kādısı -zîdet fezâiluhû- ve iftihârü’l-emâcid ve’l-ekârim câmi‘ü’l-mehâmid ve’l-mekârim el-muhtas bi-mezîd-i inâyeti’l-meliki’d-Dâim Dergâh-ı mu‘allâm yeniçerileri ağası ( ) -dâme mecdühû- tevkī‘-i refî‘-i hümâyûn vâsıl olıcak ma‘lûm ola ki; kıdvetü’l-emâcid ve’l-a‘yân İbrahim -zîde mecdühû- dîvân-ı hümâyûnuma arzuhâl edip İstanbul ihtisâbı mukāta‘ası senevî otuz üç yük on iki bin yedi yüz elli akçe mâl ile ber-vech-i mâlikâne uhdesinde olup mâla kıyâs ile kalemiye ve harc muhâsebesi bi’l-cümle kırk yük akçeye bâliğ olup lâkin beher sene İstanbul’a pasdırmalık için gelen süreklerden eslâfı zamânlardan izdiyâd-ı resm-i mîrî alınır deyü münâza‘a olundukda cümle sürekçiler bir yere gelip rûz-ı Kasım’dan sonra gelen süreklerden otuz bir guruş ve resm-i mîrîleri alınmak üzere nizâm verilmekle ta‘allül ve tereddüd îcâb etmeziken sürekçi tâifesinden bazıları arzuhâl ve kayd-ı atîki derkenâr ile ihtilâl-i nizâma bâ‘is ve mukāta‘a mâlının noksanına bâdî olmalarıyla ol makūle kayd-ı atîki derkenâr ettirmek murâd edenlerin arzuhâllerine derkenâr ettirilmeyip ve kaydına şerh verildiği üzere rüsûmâtları tahsîl ettirilmek için emr-i şerîfim verilmek ricâ etmeğin Hazîne-i âmiremde mahfûz olan İstanbul mukāta‘ası defterlerine nazar olundukda beher sene Yedikule hâricinde Tokat nâm mahalle celeb tâifesinin rûz-ı Kasım’dan sonra getirdikleri inekler yüz yetmişden iki yüze varınca bir sürek tâ‘bir olunup mezkûr sürekler içinde mahlût öküz ve tosun var ise ayrılıp kasablar kethüdâsı ma‘rifetiyle vakt-i izne dek meks ve ârâm olunup ve beher sürek başına otuz birer guruş resm-i mîrî İstanbul ihtisâbı mukāta‘ası emîni tarafına edâ olunmadıkça kethüdâları ma‘rifetiyle kasab ustalarına tevzî‘ ve taksîm olunmayıp tâife-i mezbûrun getirdikleri süreklerinden beher sürek başına otuz birer guruş resm-i mîrî tahsîl ettirilip edâda muhâlefet ettirmemesi’çün bu şürût düstûrü’l-amel olmak üzere mahalline kaydolunup rüsûm-ı mezkûr tahsîli için evâmir-i şerîfim veriligeldiği mukayyed ve bu def‘a mûcebince kaydına şerh verildiği derkenâr olunmağın mûcebince rüsûmâtların tahsîl ettirilip ta‘allül ve muhâlefet ettirilmemek için mahalline kayd ve emr-i şerîfim verilmek bâbında iftihârü’l-emâcid ve’l-ekâbir bi’l-fi‘il başdefterdârım el-Hâc İbrahim -dâme ulüvvühû- telhîs eylemeğin telhîsi mûcebince mahalline kaydolunmağla imdi vech-i meşrûh üzere amel olunmak emrolunup dahi şürût-ı mezkûra düstûrü’l-amel olmak üzere Hazîne-i âmirem defterlerine kayd ve şerh verilmekle rüsûm-ı mîrîlerin tahsîl ve edâ ettirip hilâf-ı şürût kimesneye ta‘allül ve muhâlefet ile cânib-i mîrîye gadrettirmeyesin deyü hüdâvendigâr-ı sâbık zamânında emr-i şerîf verilip tecdîdin ricâ etmeğin buyurdum ki bu bâbda mukaddemâ ve hâlâ verilen emr-i âlîşânımın mazmûn-ı mesfûru üzere amel edip hilâfına bir türlü rızâ ve cevâz göstermeyesin şöyle bilesin alâmet-i şerîfe i‘timâd kılasın. Tahrîren fi’l-yevmi’l-ışrîn şehr-i Cumâdelûlâ sene selâse ve erba‘în ve mi’e ve elf. Be-makām-ı Kostantıniyye el-mahrûse.