Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 606 Hüküm no: 824 Orijinal metin no: [149a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şişeci esnafının işlerine hassa mimarbaşının bakacağı Akzâ kuzâti’l-Müslimîn evlâ vülâti’l-muvahhidîn ma‘deni’l-fazl ve’l-yakīn râfi‘-i a‘lâmü’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtas bi-mezîd-i inâyeti’l-meliki’l-Mu‘în Mevlânâ İstanbul kādısı -zîde fezâiluhû- ve kıdvetü’l-emâcid ve’l-a‘yân hâssa mi‘mârbaşısı -zîde mecdühû- tevkī‘-i refî‘-i hümâyûn vâsıl olıcak ma‘lûm ola ki; şişeciyân fukarâları dîvân-ı hümâyûnuma arzuhâl edip İstanbul ve tevâbi‘inde şişe işleyici esnâfı fukarâları olup ötedenberü umûr ve husûslarına hâssa mi‘mârbaşıları karışagelip âhardan müdâhale olunmak iktizâ etmez iken birkaç seneden berü müteveffâ İbrahim Paşa etbâ‘ından Ömer nâm kimesne bir mikdâr akçe hazîne-mânde ve mukābelesinde İstanbul tevâbi‘inde vâki‘ şişe ve göztaşı ve sülügen işleyen fukarâya nâzır ve kethüdâ olmak üzere ihdâs ve üzerine berât ettirip fukarâdan cebren katî vâfir akçe gasbeylediklerinden nâşî dâimâ te‘addî ve rencîdeden hâlî olmamakla nezâret-i mezbûre muhdesâtdan olduğuna binâen kadîmîsi üzere hâssa mi‘mârbaşıları taraflarından görülüp fukarâya bir tarîkiyle hilâf-ı şer‘-i şerîf rencîde eylememek şartıyla mezbûr Ömer’in kaydı ref‘ ve terkīn ve fîmâ-ba‘d hazîne-mânde mütâlebesiyle ta‘arruz ettirilmemek üzere mahalline kayd ve emr-i şerîf-i âlîşânım verilmek bâbında [149b] istirhâm etmeleriyle husûs-ı mezbûr bida‘-i seyyieden olan muhdesâtdan olup fukarâya gadr ve te‘addîyi mûceb hâletden olduğu sûretde ref‘i isâbet-i mahz ise ma‘rifet-i şer‘le görülüp keyfiyeti sıhhati üzere i‘lâm olunmak için iftihârü’l-ümerâ ve’l-ekâbir bi’l-fi‘il başdefterdârım Ali -dâme ulüvvühû- telhîsi ve sâdır olan fermân-ı âlîşânım mûcebince mezbûr esnâfdan şişeci tâifesinden ma‘lûmü’l-esâmî on nefer Müslimîn ve sekiz nefer Yahûdiler meclis-i şer‘de hâssa mi‘mârbaşı tarafından vekîl-i sâbitü’l-vekâlesi Hüseyin mahzarında kadîmü’l-eyyâmdan berü umûm ve husûsumuz zikr [olunan] mi‘mârbaşı tarafından olup âhardan müdâhale edegelmiş değil iken Ömer nâm kimesne üzerimizi nâzır ve kethüdâlık ihdâs ve üzerine berât ettirip her birimize bi-gayr-ı hakkın rencîde ve gadr ve te‘addî etmeğin husûs-ı mezkûr muhdesâtdan olmağla mezbûr Ömer’in kaydı terkīn ve hazîne-mânde mütâlebesiyle ta‘arruz olunmayıp kadîmî üzere zikrolunan hâssa mi‘mârbaşılarından mâ‘adâ kimesne üzerlerine [umûrlarına] müdâhale ettirilmemek bâbında emr-i âlîşânım ricâsında oldukları bin yüz kırk üç senesi Cumâdelâhîre’nin yirmi dördüncü günü târihiyle müverrah İstanbul kādısı Mevlânâ Ebûbekir -zîdet fezâiluhû- hatmiyle mahtûm i‘lâm etmeğin imdi telhîs ve i‘lâmı mûcebince amel olunmak bâbında fermân-ı âlîşânım sâdır olmuşdur. Buyurdum ki hükm-i şerîfim vardıkda bu bâbda sâdır olan emrim üzere amel edip dahi husûs-ı mezbûr bida‘-i seyyieden muhdesâtdan olmağla merkūm Ömer’in nezâret kaydı Hazîne-i âmirem defterlerinden ref‘ ve terkīn olunmağla ve esnâf-ı mezbûrenin umûrlarına kadîmî üzere hâssa mi‘mâr -zîdet mecdühû- tarafından mâ‘adâ bir ferde müdâhale ettirmeyip ve mezbûr Ömer’in hazîne-mânde eylediği akçei mütâlebe ile fukarâyı bir türlü rencîde ve te‘addî ettirmeyesin ve ba‘de’n-nazar bu hükm-i hümâyûnumu mezbûr şişeci esnâfı fukarâsının yedlerinde ibkā [edesin] şöyle bilesin alâmet-i şerîfe i‘timâd kılasın. Tahrîren fi’l-yevmi’l-hâmis min-şehri Recebi’l-ferd li-sene selâse ve erba‘în ve mi’e ve elf.