Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 607 Hüküm no: 825 Orijinal metin no: [149b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. İsmail Efendi’nin menzil vakfiyesi Mâ-nüzime fîh mine’l-vakfi’l-celîl ve şerâiti’l-makbûle ve’t-tescîl ve’l-hükm ve’l-kazâ ve’l-imzâ vaka‘a alâ-nehci’ş-şerî‘ati’l-garrâ. Harrerehü’l-fakīru ilâ-Rabbihi’l-kadîr. Mustafa el-müvellâ hilâfeten bi-medîneti Kostantıniyye el-mahmiyye. Gufira-leh Hamd-i firâvân ve şükr-i bî-pâyân ol hâlık-ı dü-cihân ve râzık-ı ins ü cân mâlikü’l-mülki’l-melekût Rabbi’l-izzeti ve’l-ceberût vâkıf-ı mevâkıf-ı mümkinât ve mebde’-i bedâyi‘-i masnû‘ât celle şânühu ve azze sultânühû hazretlerinin dergâh-ı akdes ve dergâh [bârgâh]-ı mukaddesine îsâr olunur ki âmme-i mevcûdâtı tarz-ı bedî‘ üzere ibdâ‘ ve kâffe-i masnû‘âtı tavr-ı menî‘ üzere ihtirâ‘ eyledi ve cevâhir-i salavât-ı fâizü’l-berekât ve zevâhir-i teslîmât-ı anberîni’n-nefehât ol sultân-ı cumhûr-ı enbiyâ ve unvân-ı menşûr-ı asfiyâ resûl-i ekrem ve nebiyy-i muhterem -sallallâhu te‘âlâ aleyhi ve sellem- hazretlerinin arsa-yı pâk ve ravza-i ıtırnâklarına îsâr olunur ki nokta-yı vücûdları bâ‘is-i îcâd-ı levh ü kalem ve mûceb-i tekvîn-i sahâif-i âlemdir ve sunûf-ı cevâhir-i tahiyyât âl ve kirâm ve ashâb-ı izâm zü’l-ihtirâm hazretlerinin meşâhid-i celiyye ve merâkıd-ı aliyyelerine ihdâ olunur ki her biri mütevellî-i cihât-ı dîn ve nâzır-ı şer‘-i seyyidü’l-mürselîndir -rıdvânullâhi te‘âlâ aleyhim ecma‘în.- Ve ba‘d işbu vesîka-i enîkanın mûceb-i tastîr ve terkīmi Dârü’l-hilâfeti’l-aliyye Kostantıniyye el-mahmiye mahallâtından Toptaşı Mahallesi’nde sâkine fahrü’l-muhadderât sâhibetü’l-hayrât ve’l-hasenât ve tâlibetü’s-sadakāt ve’l-meberrât Fâtıma bt. İsmail Efendi b. İbrahim nâm hatun meclis-i şer‘-i hatîr-i lâzımü’t-tevkīrde vakf-ı âti’z-zikre li-ecli’t-tescîl ve li-itmâm-ı emri’t-tekmîl mütevellî nasb ve ta‘yîn olunan hâlâ zevci mevkūfât halîfelerinden umdetü erbâbi’t-tahrîr ve’l-kalem zübdetü ashâbi’t-tastîr ve’r-rakam ikinci halîfe Mustafa Efendi b. el-merhûm Beyâzî Mehmed Efendi mahzarında ikrâr-ı sahîh-i şer‘î ve i‘tirâf-ı sarîh-i mer‘î edip dâhiliyesinin bi’l-cümle arsa ve binâsı ve hâriciyesinin işbu yedimde olan mümzâ ve mahtûm mütevellî temessükü nâtıka olduğu üzere arsası Başçı el-Hâc Mahmud Vakfı’na senede yüz seksen akçe mukāta‘a ile ebniyesi ve yine hâriciyye-i mezbûrede Fenâyî Dede Tekyesi tarafında vâki‘ taş duvarın kezâlik yedimde [150a] olan temessük nâtıka olduğu üzere senede Fenâyî Dede evlâdlarına beş akçe mukāta‘a ile ebniyesi vakf-ı âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan ba‘zan Abâcı Ahmed Çelebi tasarrufunda olan vakıf menzil ve ba‘zan Fenâyî Dede Tekyesi ve bir tarafdan ba‘zan meşrûta vakıf menzil ve ba‘zan Kasab Halil Mescid-i şerîfi vakfından Ali Beşe ve Ümmügülsüm tasarruflarında olan vakıf menzil ve ba‘zan er karındaşım Nâzırzâde umdetü’l-müderrisîni’l-kirâm Mehmed Efendi menzili ve bir tarafdan yine mûmâ-ileyh Nâzırzâde Mehmed Efendi menzili ve bir tarafdan tarîk-i âm ile mahdûd ve dâhiliye-i mezkûresinde fevkānî dört bâb oda ve bir sofa ve bir kenîf ve dehlîz ve tahtânî bir bâb oda ve câmekân odası ve bir halvetli hamam ve matbah ve eşcâr-ı müsmire ve gayr-ı müsmireli iki kıt‘a bahçe ve bir bi’r-i mâ ve kenîf ve hâriciyye-i mezkûresinde fevkānî iki bâb oda ve bir sofa ve dehlîz ve tahtında ahır ve bir kârgîr mahzen ve kenîf ve havluyu müştemil menzilin bi’l-cümle mülk olan dâhiliye-i mezkûresini ve ber-vech-i muharrer arsası mukāta‘alı hâriciyye-i mezbûrenin ebniye-i memlûkesini ve mârru’z-zikr ebniyesi mülk taş duvarı hasbeten lillâhi’l-meliki’l-ahad ve taleben li-merzâti’r-Rabbi’s-samed vakf-ı sahîh-i muhalled ve habs-i sarîh-i müebbed ile vakıf ve habsedip şöyle şart ve ta‘yîn eyledimki ben hayâtımda oldukça mütevellî olup menzil-i mezbûrda sâkine olam ve emr-i Rabbânî ve fermân-ı samedânî ile dâr-ı fenâdan dâr-ı bekāya intikāl eylediğimde zevcim mûmâ-ileyh Beyâzîzâde Mustafa Efendi’ye meşrûta olup menzil-i mezbûrda hayâtda oldukça sâkin ola ba‘de’l-vefâtihi menzil-i mezbûr işbu kızım oğlu Tahir Mehmed Çelebi’ye meşrûta olup mezbûr Tahir Mehmed Çelebi menzil-i mezbûrda diler ise sâkin ve diler ise sâir evkāf misillü icâre-i mu‘accele ve müeccele ile âhara îcâr edip bi’l-cümle icâresine mutasarrıf ola ba‘de’l-vefâtihi mezbûr Mehmed Tahir Çelebi’nin evlâdı ve evlâd-ı evlâdı ve evlâd-ı evlâd-ı evlâdının zükûr ve inâsı batnen ba‘de batnin ve karnen ba‘de karnin mütevellî olup dilerler ise sâkin ve dilerler ise âhara îcâr edip icâresine ale’s-seviyye mutasarrıf olalar ba‘de’l-inkırâz li-ebeveyn er karındaşım mûmâ-ileyh Nâzırzâde Mehmed Efendi’nin evlâdına ve evlâd-ı evlâdına ve evlâd-ı evlâd-ı evlâdına meşrûta olup kezâlik zükûr ve inâsı batnen ba‘de batnin ve karnen ba‘de karnin mütevellî olup ber-vech-i muharrer dilerler ise menzil-i mezbûrda sâkin ve dilerler ise âhara îcâr edip icâresine ale’s-seviyye mutasarrıf olalar ve ba‘de’l-inkırâzi’l-küll tevliyet-i mezbûre merhûm Akbaba Mehmed Efendi mescid-i şerîfinde imâm olanlara meşrûta ola ve menzil-i mezbûr kezâlik icâre-i mu‘accele ve müeccele ile âhara îcâr olunup icâre-i mezbûre yed-i mütevellî ile mescid-i mezbûrun şem‘ ve kanâdil ve sâir mühimmât-ı lâzımesine sarf oluna ve vakf-ı mezbûra ahâlî-i mahalle hasbî nâzır olalar ve vakf-ı mezbûrun tebdîl ve tağyîr ve taklîl ve teksîri merreten ba‘de uhrâ yedimde ola ve mürûr-ı eyyâm ile şürût-ı mezkûreye ri‘âyet müte‘azzire olursa vakf-ı mezbûr mutlaka fukarâ-yı Müslimîn ola deyü ta‘yîn-i şürût ve tebyîn-i kuyûd-birle dâhiliye-i mezbûre ile hâriciyye-i mezbûrenin ebniye-i mezkûresini ve mârru’z-zikr taş duvarı fâriğân ani’ş-şevâgil mütevellî-i mezbûra def‘ ve teslîm eylediğimde ol dahi vakfiyet üzere kabz ve tesellüm eyledi dedikde gıbbe’t-tasdîkı’ş-şer‘î vâkıfe-i mûmâ-ileyhâ Fâtıma Hatun inân-ı kelâmını cânib-i vifâkdan semt-i şikāka atfedip eğerçi vakf-ı akār İmâm-ı A‘zam ve hümâm-ı efham Ebû Hanîfe el-Kûfî -cûziye hayrü’l-cezâ ve kûfiye- hazretleri mezheb-i şerîflerinde sahîh velâkin gayr-ı lâzım olup arâzi-i mevkūfe üzerinde olan ebniyenin cihet-i uhrâya vakfiyeti dahi ba‘zı eimme-i kirâm katlarında sahîh olmamağla vakf-ı mezbûrdan rücû‘ ve dâhiliye-i mezbûre ile ebniye-i mezkûreyi kemâfi’l-evvel mülküme istirdâd murâd ederim dedikde mütevellî-i reşid mûmâ-ileyh cevâb verip eğerçi hâl bast olunan minvâl üzeredir lâkin İmâm-ı Ebû Yusuf hazretleri mezheb-i şerîflerinde vâkıf mücerred vakaftü demekle vakf-ı sahîh ve arâzi-i mevkūfe üzerinde olan ebniyenin dahi cihet-i uhrâya vakfiyeti ba‘zı eimme-i i‘zâm katlarında sahîh olup sıhhat-i lüzûmdan müfârık olmadığına imâmeyn-i hümâmeyn hazretleri müttefiklerdir deyü red ve teslîmden imtinâ‘ edip hâkim-i muvakki‘-ı sadr-ı kitâb -tûbâ-lehû ve hüsnü meâb-hazretleri huzûrunda müterâfi‘ân ve her biri mübtegāsınca fasl ü hasma tâlibân olduklarında hâkim-i câsim -esbaga’llâhu ni‘amehû aleyh- hazretleri dahi mesâil-i evkāfda beyne’l-eimme vâki‘ olan hilâf ve ihtilâfa âlim olmağla tarafeynin kelâmını ısgā ve cânib-i vakfı evlâ görüp alâ-kavli men-yerâhü vakf-ı mezbûrun sıhhat ve lüzûmuna hükm-i sahîh-i şer‘î ve kazâ-i sarîh-i mer‘î etmeğle min-ba‘d vakıf hükm-i mersûm ile sahîh ve lâzım olup nakz ve nakzına [150b] mecâl muhâl oldu. “Femen beddelehû ba‘demâ semi‘ahû [fe-innemâ ismühû] ale’l-lezîne yübeddilûnehû innallâhe semî‘un alîm ve ecrü’l-vâkıf ale’l-hayyi’l-cevâdi’l-kerîm.” Cerâ zâlik ve hurrire fi’l-yevmi’s-sâdis min-şehri Rebî‘i’l-evvel li-sene selâse ve erba‘în ve mi’e ve elf. Şuhûdü’l-hâl: Nâzırzâde Nuh Efendi b. Mehmed, Abdurrahman Efendi b. el-Hâc Hasan el-imâm, Hasan Efendi b. Osman, Mahmud Efendi b. Hasan, Hasan Beşe b. Mehmed, Ali Dede b. Mehmed, Molla İbrahim b. Halil Efendi, Molla Mustafa b. Halil, Halil Efendi b. Mustafa, Süleyman Ağa b. Mehmed, Mehmed Ağa b. Mehmed, Mustafa Çelebi b. el-Hâc Mehmed, Halil Efendi b. İbrahim imâm-ı Molla Gürânî, Tabib Mustafa Efendi, el-Hâc Mehmed b. Abdullah, Ahmed Çelebi b. Abdullah, Yağlıkçı es-Seyyid Ahmed Çelebi, Mehmed Çelebi b. Abdullah.