Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 278 Hüküm no: 393 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Mehmed Ağa’nın vârislerinin, malları elinde bulunduran Ahmed Ağa’dan haklarını aldıkları Husûs-ı âti’l-beyânın mahallinde tahrîr olunması iltimâs olunmağın savb-ı şer‘-i kavîmden mevlânâ Abdulkādir Efendi irsâl olunup ol dahi zeyl-i kitâbda mastûrü’l-esâmî olan Müslimîn ile mahmiye-i İstanbul’da Gül Câmi‘-i şerîfi Mahallesi’nde sâkin olup sabıkā bostancıbaşı olan iftihârü’l-emâcid ve’l-ekârim câmi‘ü’l-mehâmid ve’l-mekârim Ahmed Ağa b. ( ) -zîde kadruhu-nun menziline varıp akd-i meclis-i şer‘-i şerîf eyledikde bundan akdem maktûlen vefât eden sâbık Kapıcı Mehmed Ağa b. Veli’nin bi’l-inhisâr vârisi olan li-ebeveyn karındaşları Şa‘ban Bey ve Şahin Bey ve Derviş Çavuş asaleten ve yine li-ebeveyn karındaşları Mustafa Bey tarafından meblağ-ı âti’l-beyândan hisse-i şer‘iyyesini ahz u kabz ve kendüye îsâle ve ibrâ-i zimmete vekîl olup vekâleti hasm-ı münkir mahzarında mezbûrân Şahin Bey ve Derviş Çavuş şehâdetleri ile şer‘an sâbite olan mezbûr Şa‘ban Bey vekâleten ve yine li-ebeveyn kız karındaşları Zilkade nâm hatun tarafından dahi vech-i muharrer üzere vekîl olup vekâleti merkūmân Şa‘ban Bey ve Şahin Bey şehâdetleri ile şer‘an sâbite olan mezbûr Derviş Çavuş vekâleten meclis-i mezbûrede müteveffâ-i mezbûrun muhallefâtına vâzı‘u’l-yed işbu bâ‘isü’l-kitâb mûmâ-ileyh Ahmed Ağa muvâcehesinde herbiri ikrâr-ı tâm ve takrîr-i kelâm edip mûrisimiz müteveffâ-i mezbûr Mehmed Ağa hâl-i sıhhatinde mûmâ-ileyh Ahmed Ağa’ya emâneten def‘ ve teslîm ol dahi kabz ve tesellüm eylediği yedi yüz seksen aded altını <> ba‘de vefâtihi îsâl etmek için mûmâ-ileyh Ahmed Ağa’da halîfe el-bostanî emânet vaz‘ eylediği bin elli aded altını cem‘an bin sekiz yüz otuz aded altın mûmâ-ileyh Ahmed Ağa’dan işbu meclisde bi’t-tamam ve’l-kemâl asâleten ve vekâleten ahz u kabz eyleyip zikrolunan bin sekiz yüz otuz aded altından vesâir muhallefâtından mûmâ-ileyh Ahmed Ağa’da bir şey hakkımız kalmayıp her [birimiz] müteveffâ-i mezbûrun muhallefâtına cemî‘-i de‘âvî ve mutâlebât ve eymân ve muhâsamâtdan mezbûr Ahmed Ağa’nın zimmetini ibrâ-i âmm-ı kātı‘u’n-nizâ‘ ile asâleten ve vekâleten herbirimiz ibrâ ve ıskāt eyledik, gıbbe’t-tasdîkı’l-mu‘teber vâki‘ hâli mevlânâ-yı mezbûr mahallinde tahrîr ba‘dehû meclis-i şer‘a gelip vukū‘u üzere inhâ ve takrîr etmeğin mâ-hüve’l-vâki‘ gıbbe’t-taleb ketb ü sebt olundu. Fi’l-yevmi’s-sâlis ve’l-ışrîn min-şehri Recebi’l-mürecceb li-sene erba‘a ve sittin ve elf. Şuhûdü’l-hâl: Mevlânâ Abdurrahman Efendi b. Mustafa el-müderris, İbrahim b. Ramazan, Ömer Çelebi b. Mehmed, Ömer Bey b. Ali, Ahmed Bey b. Sefer el-cündî, Osman b. Abdullah, Hasan Beşe b. Ali, İbrahim Çelebi b. Davud, Ali Bey b. Abdullah ve gayruhum mine’l-huzzâr.