Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 279 Hüküm no: 394 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maer v. Hadir’in cariyesini kitâbet yoluyla azat ettiği Mahmiye-i İstanbul’da Kalora cemâ‘atinden Maer v. Hadir nâm Yahûdi meclis-i şer‘-i hatîr-i lâzımü’t-tevkīrde kendüye rıkkını mu‘terife olan açık kaşlı, gök elâ gözlü, yüzü çiçek eseri olan işbu hâfızatü’l-kitâb Habe bt. Faribe nâm câriye-i memlûkesi muvâcehesinde ikrâr-ı tâm ve takrîr-i kelâm edip mevsûfe-i mezbûre Habe’yi iki yüz kıt‘a riyâlî guruşa kitâbete kesip meblağ-ı mezbûrdan otuz altı guruşunu mezbûre Habe yedinden ahz u kabz edip bâkī kalan yüz altmış dört guruşunu bana teslîm eyledikde mezbûre Habe sâir harâir-i asliyyât gibi hürre olup üzerinde hakk-ı velâdan gayrı hakkım kalmadı dedikde mezbûre Habe dahi kitâbet-i merkūmeyi kabûl etmeğin mâ-hüve’l-vâki‘ bi’t-taleb ketb ü sebt olundu. Fi’l-yevmi’s-sânî ve’l-ışrîn min-Recebi’l-mürecceb li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Pîrî Beşe b. Hüseyin, Kaytas b. Abdullah, Mehmed b. Hüseyin ve gayruhum mine’l-huzzâr.