Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 55 Hüküm no: 8 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Macûnî Kasım Camii nükud vakfına İsmail Çelebi’nin nâzır tayin edildiği Bâ-imzâ-i hazret-i efendi. Mahmiye-i İstanbul’da Macûnî Kasım Câmi‘-i şerîfi imâmı Mehmed Efendi b. Receb Efendi ve ahâlî-yi mahallesinden Mehmed Çavuş b. Abdullah ve diğer Mehmed Çelebi b. Ali ve Abdullah Çelebi b. Ömer ve el-Hâc Abdülbaki Çelebi b. Mehmed ve Hüseyin Çelebi b. Mehmed ve Berber Mustafa Çelebi b. Hasan ve sâirleri meclis-i şer‘-i hatîr-i lâzımü’t-tevkīrde mahalle-i mezbûre ahâlîsinden bâ‘isü hâze’l-kitâb İsmail Çelebi b. Ahmed nâm kimesne mahzarında her biri takrîr-i kelâm ve bast-ı merâm edip zikrolunan câmi‘-i şerîf nukūd-ı mevkūfesine mütevellî olan Ömer Çelebi b. ( ) nâm kimesneden emniyetimiz olmamağla mezbûr İsmail Çelebi her vechile emîn ve mu‘temedün-aleyh kimesne olmağın mütevellî-yi mezbûr üzerine kıbel-i şer‘den hasbî nâzır nasb ve ta‘yîn olunmak matlûbumuzdur dediklerinde hâkim-i muvakkı‘-ı sadr-ı kitâb tûbâ-leh ve hüsnü-meâb hazretleri cemâ‘at-ı mezkûre iltimâslarıyla mütevellî-yi mezbûr üzerine merkūm İsmail Çelebi’yi ber-vech-i hasbî nâzır nasb ve ta‘yîn buyurduklarında ol dahi nezâret-i mezkûreyi kabûl ve merâsimini edâya ta‘ahhüd ve iltizâm etmeğin mâ hüve mâ-hüve’l-vâki‘ bi’t-taleb ketb olundu. Fi’l-yevmi’s-sâlis aşer min-şuhûri Ramazani’l-mübârek li-sene selâse ve erba‘în ve mie ve elf. Şuhûdü’l-hâl: Mehmed Çelebi b. Abdullah, Abdullah Çelebi b. Mustafa, Du‘âcı İbrahim Halîfe b. Mustafa, Yakub b. Abdullah, Hüseyin b. Mehmed, Mahmud b. Ahmed, Urfalı Mustafa b. Mehmed, Çukadâr el-Hâc Mehmed.