Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 56 Hüküm no: 9 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Devrekânî kazasından Halil b. Mehmed’in Küre-i nühâs Emini Mehmed Ağa’daki alacak davasının sulhla sonuçlandığı Vilâyet-i Anadolu’da Devrekânî kazâsına tâbi‘ Akpınarı Lâle Divanı nâm karye ahâlîsinden olup mahmiye-i İstanbul’da Vâlide Câmi‘-i şerîfi kurbünde sâkin bâ‘isü hâze’l-kitâb Halil b. Mehmed nâm kimesne meclis-i şer‘-i şerîf-i enverde sâbıkā Küretünnühâs Emîni Mehmed Ağa b. Ali mahzarında ikrâr ve takrîr-i kelâm edip mezbûr Mehmed Ağa [tâ]rih-i kitâbdan üç sene mukaddem beni ahz u kabz ve bi-gayr-ı hakkın üç yüz elli guruşumu ahz u kabz etmekle meblağ-ı mezbûru merkūm Mehmed Ağa’dan taleb ve da‘vâya tesâddî eylediğimde ol dahi inkâr etmeğin ben müdde‘âmı isbât sadededinde iken ba‘de’n-nizâ‘ beynimiz[e] tavassut edip da‘vâ-yı mezkûremden beni mezbûr Mehmed Ağa ile iki yüz guruş üzerine sulh eylediklerinde ben dahi sulh-ı mezkûru kabûl ve bedel-i sulh-ı mezkûr iki yüz guruşu mezbûr Mehmed Ağa yedinden ahz u kabz eylediğimden sonra husûs-ı mezkûra müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 11 Ramazan sene 1143 Şuhûdü’l-hâl: Mehmed Çelebi b. Abdullah, Salih b. Süleyman, Abdullah b. Mustafa, Molla İbrahim b. Mustafa.