Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 56 Hüküm no: 10 Orijinal metin no: [1b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gümrük’te sırık hamallığı yapmak isteyen Hasan Bey’in iş için verdiği parayı geri talep etmesi Vilâyet-i Anadolu’da Taşköprü kazâsına tâbi‘ Depedelik nâm karye ahâlîsinden olup mahmiye-i İstanbul’da Balıkpazarı kurbünde sâkin Hasan b. Hüseyin Bey nâm kimesne meclis-i şer‘-i şerîf-i enverde mahmiye-i mezbûrede Gümrük-i âmire sırık hammâlları hırfeti erbâbından işbu râfi‘u’l-vesîka Mehmed b. Mustafa mahzarında üzerine da‘vâ ve takrîr-i kelâm edip târih-i kitâbdan bir ay mukaddem hırfet-i mezbûreye duhûl eylemek için mezbûr Mehmed’e mâlımdan otuz guruş def‘ ve teslîm ol dahi yedimden ba‘de’l-kabz ben hırfet-i mezbûre hizmetini [2a] edâya iktidârım <> olmamağla mezbûr Mehmed’e suâl olunup meblağ-ı mezbûru geri red ve teslîme tenbîh olunması murâdımdır dedikde gıbbe’s-suâl mezbûr Mehmed cevâbında fi’l-vâki‘ müdde‘î-yi mezbûr Hasan zikrolunan sırık hammâllığı hırfetine duhûl etmek murâd etmekle ber-mu‘tâd-ı kadîm ma‘lûmü’l-esâmî ihtiyârlarımıza tevzî‘ ve taksîm etmek üzere otuz guruşu bana def‘ ve teslîm ve ber-vech-i muharrer bana emretmekle ben dahi meblağ-ı mezbûru yedinden ahz u kabz ve emr-i mezkûruna binâen mezbûrûn ihtiyârlarımıza tevzî‘ ve taksîm eylediğimden sonra meblağ-ı mezbûr da‘vâsından beni hırfet-i mezbûre erbâbını ibrâ-i âmm-ı râfi‘u’l-hısâm ile ibrâ ve ıskāt etmişidi deyü def‘le mukābele edicek gıbbe’l-istintâk ve’l-inkâr mezbûr Mehmed’den def‘-i mezkûruna mutâbık beyyine taleb olundukda udûl-i ahrâr-ı ricâl-i Müslimînden ve hırfet-i mezkûre erbâbının gayri Gümrük-i âmire huddâmından İbrahim b. Veli ve Mehmed b. Ahmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müdde‘î-yi mezbûr Hasan bir ay mukaddem zikrolunan sırık hammâllığı hırfetine duhûl eylemek için mezbûr Mehmed’e otuz guruş def‘ ve teslîm ve ber-mu‘tâd-ı kadîm ma‘lûmü’l-esâmî ihtiyârlarına tevzî‘ ve taksîme mezbûr Mehmed’e emretmekle ol dahi meblağ-ı mezbûru ahz u kabz ve emr-i mezkûruna binâen mezbûrûna tevzî‘ ve taksîm eylediğimden sonra mezbûr Hasan meblağ-ı mezbûr da‘vâsından mezbûr Mehmed’i vesâir hırfet-i mezkûre erbâbını bizim huzûrumuzda ibrâ ve ıskāt etmişidi. Biz bu husûsa bu vech üzere şâhidleriz şehâdet [da]hi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince müdde‘î-yi mezbûr Hasan bî-vech mu‘ârazadan men‘ birle mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min-şehri Ramazani’l-mübârek li-sene selâse ve erba‘în mie ve elf. Şuhûdü’l-hâl: Mehmed Çelebi b. Abdullah, İbrahim b. Mustafa du‘âcı, Abdullah b. Mustafa, Salih b. Selim.