Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 57 Hüküm no: 11 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hammâmî Mehmed’in Salih Bey’deki alacağına dair vârisleri tarafından açılan davanın sulhla sonuçlandığı Medîne-i Selanik ahâlîsinden iken bundan akdem vefât eden Hammâmî <> Mehmed b. Yusuf b. Abdullah nâm müteveffânın verâseti zevce-i metrûkesi Âişe bt. Mehmed nâm hatun ile sulbiye kebîre kızı Hanife’ye münhasıra ve terekesi sekiz sehim i‘tibârıyla biri zevcesi mezbûreye ve birisi kızı mezbûre Hanife Hatun’a isâbet ve intikāl eylediği zâhir ve mütehakkık oldukdan sonra mezbûre Hanife Hatun meclis-i şer‘-i şerîf-i enverde Görice kasabası ahâlîsinden olup İstanbul’da Kalenderhâne mahallesinde müsâfiren sâkin Abdullah Bey b. Salih Bey b. Emrullah mahzarında ikrâr-ı tâm ve takrîr-i kelâm edip mûrisimiz müteveffâ-yı mezbûr Hammâmî Mehmed hâl-i hayatında mezbûr Abdullah Bey’in babası mezbûr Salih Bey’e iki yüz guruş idâne ve teslîm ol dahi istidâne ve tesellüm ve kabz ve istihlâk ettikden sonra kable’l-ahz mezbûr Salih Bey vefât edip terekesine oğlu merkūm Abdullah Bey vâzı‘u’l-yed olmağla vâlidem mezbûre Âişe meblağ-ı mezbûrdan sümün hisse-i irsiyesini mezbûr Abdullah Bey’den bundan akdem taleb ve da‘vâ eylediğimde ol dahi cevâbında sen ve vâliden işbu Âişe Hatun bin yüz otuz iki senesinde husûs-ı mezkûru benden da‘vâ ve kırk guruş bedel-i medfû‘-ı makbûza benimle sulh ve mâ‘adâya müte‘allika âmme-i da‘vâdan zimmetimi ibrâ ve ıskāt etmişidiniz deyü da‘vâ-yı def‘ ve def‘-i mezkûrunu ba‘de’l-isbât şâhidân-ı mezbûrân ta‘dîl ve tezkiye esnâsında iken beynimize muslihûn tavassut edip da‘vâ-yı mezkûremde beni mezbûr Abdullah Bey ile on yedi guruş üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh-ı merkūm [2b] on yedi guruşu mezbûr Abdullah yedinden ba‘de’l-kabz mâ‘adâya müte‘allika âmme-i da‘vâdan mezbûr Abdullah Bey’in zimmetini ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ aşer min-şehri Ramazani’l-mübârek li-sene selâse ve erba‘în ve mie ve elf. Şuhûdü’l-hâl: Ali Bey b. Süleyman, Ahmed Sipâhi b. Osman, Kasım Ağa b. Hasan, Osman Bey b. Sinan, Musa Beşe b. Abdullah, Ahmed b. Hasan, Mehmed Çelebi b. Abdullah bölükbaşı, İbrahim Çelebi b. Mustafa du‘âcı.