Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 58 Hüküm no: 12 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni Mıgırdıç’ın vekil tayin ettiği Parsadan v. Zahar’a açtığı davanın sulhla sonuçlandığı Bâ-imzâ-i hazret-i efendi. Fi’l-asl Acem Ermenileri’nden olup İstanbul’da müsâfiren mütemekkin Mıgırdıç v. Markar nâm zimmî meclis-i şer‘-i şerîf-i enverde râfi‘u’s-sifr Pa[r]sadan v. Zahar nâm zimmî muvâcehesinde ikrâr ve takrîr-i kelâm edip merkūm Pa[r]sadan zimmî bundan akdem diyâr-ı Acem’de Şuhûd kasabasında olan emlâkimi âhara bey‘a vekîl nasb ve ta‘yîn eylediğimde ol dahi kabûl ve yedine memhûr temessük verip ve iktizâ ederse ol diyârda mesârifime sarf için on tuğrâlı altın vermişidim. Mezbûr Parsadan emlâkimi âhara bey‘ ve kabz-ı semen eyledi deyü da‘vâ sadedinde olduğumda merkūm Parsadan inkâr etmekle beynimize muslihûn tavassut edip da‘vâ-yı mezkûremden meccânen fâriğ olup ve on tuğrâlı altından merkūm Parsadan bana beş tuğrâlı altın ve memhûr temessükü red <> ve tesellüm etmekle ben dahi yedinden kabz ve tesellüm edip âmme-i de‘âvî ve mutâlebât ve eymân ve muhâsamâtdan merkūm Pa[r]sadan zimmînin zimmetini ibrâ ve ıskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Ramazani’l-mübârek li-sene selâse ve erba‘în mie ve elf. Şuhûdü’l-hâl: Salih Çelebi b. Süleyman, İbrahim b. Abdullah, Hasan b. Abdülmennan.