Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 59 Hüküm no: 13 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gramite’nin babası Dimitri’den kalan ev hissesini kardeşi Yanaki’ye sattığı Çatalcalı Yanaki’nin mübâya‘asıdır. Mahmiye-i İstanbul’da Tevkī‘î Cafer mahallesinde sâkin iken bundan akdem hâlik olan Dimitri v. Kiryaki v. Dimitri’nin verâseti zevce-i metrûkesi Kıristi bt. Dimitraşko nâm Nasrâniye ile sulbî kebîr oğulları Yanaki ve Ligori nâm zimmîlere ve sulbiye kebîre kızı Gramite nâm Nasrâniyeye münhasıra ve mezbûre Krısti hâlik-i mezbûrun terekesinden olup mahalle-i mezbûrede vâki‘ bir tarafdan Eydam v. Zahar ve bir tarafdan Abacı Panayot ve bir tarafdan Malo ve Zafir menzilleri ve bir tarafdan tarîk-ı âm ile ulyâda üç bâb oda ve dehliz ve vustâda yine üç bâb oda ve dehliz ve süflâda bir oda ve havluyu muhtevî mülk menzilden sümün hisse-i irsiyesi nukūd-ı terekesinden ba‘de’l-ahz ve’l-istifâ menzil-i mezkûr beş sehim i‘tibârıyla ikişer sehmi oğulları mezbûrân Yanaki ve Ligori’den her birine ve birer sehim kızı mezbûre Gramite’ye isâbet ve intikāl eylediği şer‘an zâhir ve müte‘ayyin oldukdan sonra mezbûre Gramite’nin zevci tarafından husûs-ı âti’z-zikre vekîl olduğu Kasab Dimitri v. Pavlo ve Mıgırdıç v. Agop şehâdetleriyle sâbit ve sübût ve vekâletine hükm-i şer‘î lâhık olan Pavlo v. Hıristo meclis-i şer‘-i şerîf-i lâzımü’t-teşrîfde müvekkile-i mezbûrenin karındaşı râfi‘-i hâze’s-sifr mezbûr Yanaki muvâcehesinde bi’l-vekâle ikrâr ve takrîr-i kelâm edip menzil-i mezkûrdan ber-vech-i muharrer müvekkilem mezbûreye ırsen isâbet eden bir sehim hisse-i irsiye-i şâyi‘asını bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile karındaşı mezbûr Yanaki’ye üç yüz elli guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve semeni olan meblağ-ı mezbûr üç yüz elli guruşu karındaşı merkūm yedinden tamamen ahz u kabz [3a] eylediğinden sonra hisse-i mezkûrenin tağrîr ve gabnine müte‘allika âmme-i da‘vâdan ehadühümâ âharı ibrâ-i âmm-ı kātı‘u’n-nizâ‘la ibrâ ve ıskāt eyledi min-ba‘d zikrolunan bir sehim hisse müvekkile-i mezbûrenin karındaşı merkūm Yanaki’nin mülk-i müşterâsı olup kat‘a müvekkilem mezbûrenin alâka ve medhali kalmadı keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘i’l-mu‘teber mâ-hüve’l-vâki‘ bi’t-taleb ketb olundu. Fî 19 Ramazani’l-mübârek sene [1]143 Şuhûdü’l-hâl: Mehmed Efendi b. Osman el-imâm, Ömer Efendi b. Mehmed el-müezzin, Mustafa Ağa b. Abdullah, Mehmed Çelebi b. Osman, Ahmed b. Hasan es-Seyyid Mustafa b. Ahmed, Kasım b. el-Hâc Hasan, Du‘âcı Molla İbrahim b. Mustafa, es-Seyyid Mahmud el-muhzır, Panayot v. Tanaş, Panayot v. Kostantin, Kasab Dimitri v. Pavlo, Mıgırdıç v. Agop, Diyalo v. Hıristo, Kostantin v. Aleksandride ve gayruhum.