Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 60 Hüküm no: 14 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ligori’nin babası Dimitri’den kalan ev hissesini kardeşi Yanaki’ye sattığı Bu dahi kezâlik. Mahmiye-i İstanbul’da Tevkī‘î Cafer mahallesinde sâkin iken bu bundan akdem hâlik olan Dimitri v. Kiryaki v. Dimitri’nin verâseti zevce-i metrûkesi Kıristi bt. Dimitraşko nâm Nasrâniye ile sulbî kebîr oğulları Yanaki ve Ligori nâm zimmîlere ve sulbiye kebîre kızı Gramite nâm Nasrâniyeye münhasıra ve mezbûre Krısti hâlik-i mezbûrun terekesinden olup mahalle-i mezbûrede vâki‘ bir tarafdan Eydam v. Zahar ve bir tarafdan Abacı Panayot ve bir tarafdan Malo ve Zafir menzilleri ve bir tarafdan tarîk-ı âm ile mahdûd ulyâda üç bâb oda ve dehliz ve vustâda yine üç bâb oda ve dehliz ve süflâda bir oda ve havluyu muhtevî mülk menzilden sümün hisse irsiyesi nukūd-ı terekesinden ba‘de’l-ahz ve’l-istifâ menzil-i mezkûr beş sehim i‘tibârıyla oğulları mezbûrân Yanaki ve Ligori’den her birine ve bir sehim kızı mezbûre Gramite’ye isâbet ve intikāl eylediği şer‘an zâhir ve müte‘ayyin oldukdan sonra mezbûre Ligori meclis-i şer‘-i şerîf-i enverde karındaşı bâ‘isü hâze’l-kitâb mesfûr Yanaki muvâcehesinde ikrâr ve takrîr-i kelâm edip menzil-i mezkûrdan ber-vech-i muharrer bana isâbet eden iki sehim hisse-i irsiye-i şâyi‘amı bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile karındaşım mesfûr Yanaki’ye dokuz yüz on guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve semeni olan meblağ-ı mezbûr dokuz yüz on guruşu karındaşım mezbûr yedinden tamamen ahz u kabz eylediğimden sonra hisse-i mezkûrenin tağrîr ve gabnine müte‘allika âmme-i da‘vâdan her birimiz âharı ibrâ-i âmm-ı kātı‘u’n-nizâ‘la ibrâ ve ıskāt eyledik min-ba‘d zikrolunan iki sehim hisse karındaşım merkūm Yanaki’nin mülk-i müşterâsı olup kat‘a benim alâka ve medhalim kalmadı keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 19 Ramazan sene [1]143 Şuhûdü’l-hâl: eş-Şâhidûnü’s-sâbıkūn