Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 61 Hüküm no: 15 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Kiryaki’nin terekesinin vârisleri arasında taksim edilerek birbirlerinde alacakları kalmadığı Mahmiye-i İstanbul’da Tevkī‘î Cafer mahallesinde mütemekkin iken bundan akdem hâlik olan Dimitri v. Kiryaki v. Dimitri’nin verâseti zevce-i metrûkesi Kıristi bt. Dimitraşko nâm Nasrâniye ile sulbî kebîr oğulları Yanaki ve Ligori’ye ve sulbiye kebîre kızı Gramite nâm Nasrâniye münhasıra olduğu şer‘an müte‘ayyin oldukdan sonra mezbûr Yanaki meclis-i şer‘-i şerîf-i enverde ashâbü’s-sifr mezbûrân Ligori ve Kıristi ile mezbûre Gramite’nin zevci ve tarafından husûs-ı âti’z-zikre vekîl olduğu Kasab Dimitri v. Pavlo ve Mıgırdıç v. Agop nâm zimmîler şehâdetleriyle sâbit olan Pavlo v. Hıristo nâm zimmî muvâcehelerinde ikrâr ve takrîr-i kelâm edip hâlik-i mezbûrun terekesi bundan akdem ber-mûceb-i defter-i kassâm tahrîr ve defter olundukda her birimiz hisse-i irsiyemizi ahz ü kabz eylediğimizden sonra hâlik-i mezbûrun esâs-ı beyt ve evânî-i nühâsiye ve gayrisine kalîl ü kesîr ve celîl ü hakīr ve bi’l-cümle ism-i mâl ıtlâk olunur terekesine [3b] müte‘allika âmme-i de‘âvî ve mutâlebât ve muhâsamâtdan ben anam mezbûre ve karındaşlarım mezbûr Ligori ve müvekkile-i mezbûre Gramite ve zevci vekîl-i mezbûr Pavlo’yu ibrâ-i âmm-ı râfi‘u’l-hısâm ile ibrâ ve ıskāt eylediğimde onlar dahi ber-vech-i muharrer beni ibrâ-i âmm-ı râfi‘u’l-hısâm ile ibrâ ve ıskāt eylediler min-ba‘d mûrisimiz hâlik-i mezbûrun terekesine müte‘allika bir birimiz ile vechen mine’l-vücûh ve sebeben mine’l-esbâb da‘vâ ve nizâ‘ ve husûmetimiz yokdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-şehri Ramazani’l-mübârek li-sene selâse ve erba‘în ve mie ve elf. Şuhûdü’l-hâl: eş-Şâhidûnü’s-sâbıkūn