Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 61 Hüküm no: 16 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Beşe’nin Ahmed Çelebi’ye otuz altın verdiği ve almadığı iddasıyla açtığı davadan vazgeçtiği Mahmiye-i İstanbul’da Uzun Yusuf mahallesinde sâkin Abdi Beşe b. Mehmed nâm kimesne meclis-i şer‘-i şerîf-i enverde bâ‘isü hâze’l-kitâb Ahmed Çelebi b. Mustafa mahzarında ikrâr-ı tâm ve takrîr-i kelâm edip bundan akdem mezbûr Ahmed Çelebi’ye mâlımdan otuz aded Macar altını def‘ ü teslîm ol dahi yedimden ahz u kabz ve mesârifine sarfla istihlâk etmekle meblağ-ı merkūmu mezbûr Ahmed Çelebi’den taleb ve da‘vâ ol dahi bi’l-külliye inkâr etmekle beynimizde nizâ‘-ı küllî cereyân etmişidi. El-hâletü-hâzihi ben da‘vâ-yı mezkûremde kâzib ve mübtıle olmamla husûs-ı mezkûra müte‘allika âmme-i da‘vâdan merkūm Ahmed Çelebi’nin zimmetini ibrâ-i âmm-ı râfi‘u’l-hısâm ile ibrâ ve ıskāt eyledim min-ba‘d merkūm Ahmed Çelebi ile husûs-ı mezkûra müte‘allika vechen mine’l-vücûh da‘vâ ve nizâ‘ ve husûmetim yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşer min-Ramazan li-sene selâse ve erba‘în mie ve elf. Şuhûdü’l-hâl: İbrahim Çelebi b. Mehmed, Mustafa Çelebi b. Mehmed, Mehmed Çelebi b. Receb, Mustafa b. İbrahim, Mehmed b. İbrahim, Hacı Mustafa b. Mehmed, İsmail b. Mustafa, Mehmed Çelebi b. İsa, Mumcu Süleyman Beşe el-mübâşir.