Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 279 Hüküm no: 395 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Allahverdi v. Yorgi’nin evini Mustafa Beşe’ye sattığı Medîne-i Kefe mahallelerinden Tersâne Mahallesi’nde sâkin Allahverdi v. Yorgi nâm zimmî mahfil-i kazâda işbu bâ‘isü’l-kitâb Mustafa Beşe b. el-Hâc Ali mahzarında ikrâr ve takrîr-i kelâm edip mahalle-i mezbûrede vâki‘ bir tarafı Manik mülkü ve bir tarafı Karyani mülkü ve bir tarafı Takur mülkü ve bir tarafı ba‘zan Ragab mülkü ve ba‘zan tarîk-i âm ile mahdûd harâbe müşrif mülk menzilimi mezbûr Mustafa Beşe’ye nakd râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi minvâl-i muharrer üzere iştirâ ve kabûl eyledikden sonra semeni olan meblağ-ı mezbûr bin akçeyi yedinden bi’t-tamam ve’l-kemâl ahz u kabz edip mebî‘-i mezbûru mahallinde tesellüme müşteri-i mezbûr Mustafa Beşe’yi taslît eyledim ba‘de’l-yevm mebî‘-i mezbûrda benim alâka ve medhalim kalmayıp mezbûr Mustafa Beşe’nin mülk-i müşterâsı olmuşdur, keyfe mâ yeşâ’ dedikde mukırr-ı mezbûru ikrâr-ı meşrûhunda el-mukırru lehü’l-merkūm Mustafa Beşe vicâhen tasdîk ve şifâhen tahkīk etmeğin mâ-hüve’l-vâki‘ gıbbe’t-taleb ketb ü sebt olundu. Tahrîren fi’l-yevmi’s-sâbi‘ ve’l-ışrîn min-şehri Recebi’l-ferd li-sene erba‘a ve sittin ve elf. Şuhûdü’l-hâl: Mehmed Beşe b. Ramazan, Bestan b. Mustafa, Mehmed Beşe b. Hasan, Mahmud b. Abdullah, Ahmed Çelebi b. Mustafa ve gayruhum mine’l-huzzâr.