Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 62 Hüküm no: 17 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kızılviran köyü Kabasakal mahallesinde vefat eden Manav Veliyüddin’in terekesinin hanımına teslimi Bâ-imzâ-i hazret-i efendi. Fi’l-asl vilâyet-i Anadolu’da Yörükân-ı Arac kazâsına tâbi‘ Kızılviran nâm karye ahâlîsinden iken mahmiye-i İstanbul’da Kabasakal mahallesinde câmi‘-i şerîf tahtında vâki‘ Manav kapıcı Veliyüddin b. Mustafa’nın dükkânında vefât eden Ali b. Mehmed b. Bali’nin verâseti li-ebeveyn kız karındaşı olup karye-i merkūmede sâkine Âişe Hatun bt. Mehmed b. Bali’ye inhisârı tahakkukundan sonra merkūme Âişe tarafından tereke-i müteveffâ-yı merkūmu kabz ve kendiye îsâle ve kabz ve îsâl mütevakkıf olduğu umûrun küllîsine vekîl olduğu zât-ı mezbûreyi bi’l-ma‘rifeti’ş-şer‘iye ârifân Mehmed b. İbrahim ve Ömer b. Abdullah nâm kimesneler şehâdetlerinde merkūm Kapıcı Veliyüddin muvâcehesinde şer‘an sâbit olan Ali b. Muslu nâm kimesne meclis-i şer‘-i şerîf-i enverde râfi‘u’l-vesîka mezbûr Manav Kapıcı Veliyyüdin mahzarında bi’l-vekâle ikrâr ve takrîr-i kelâm edip müvekkilem mezbûre Âişe Hatun’un mûrisi müteveffâ-yı merkūm Ali b. Mehmed b. Bali hâl-i hayatında ve kemâl-i akl ve sıhhatinde merkūm Kapıcı Veliyüddin vasîyy-i muhtâr nasb ve ta‘yîn ve ihtiyâr edip musırrân vefât eyledikde merkūm Kapıcı Veliyüddin mecmû‘ başda bulunan terekesini bi’l-vesâye kabz ve semen-i misilleriyle âhara bey‘ ve semenini hıfz eylemişidi. El-hâletü-hâzihi mecmû‘ terekesinde mesârif-i defn ve sâir düyûnu edâ olundukdan sonra yedinde bâkī kalan elli guruşu vekâlet-i mahkiyem hasebiyle bana teslîm ve ben dahi yedinden kabz ve tesellüm edip tereke-i müteveffâ-yı mezbûrdan merkūm Manav Kapıcı Veliyyüdin yedinde ve zimmetinde bir akçe ve bir habbe bâkī kalmamağla husûs-ı mezbûra müte‘allika da‘vâdan merkūm Veliyüddin’in zimmetini bi’l-vekâle ibrâ ve ıskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Ramazani’l-mübârek li-sene selâse ve erba‘în ve mie ve elf. Şuhûdü’l-hâl: el-Hâc Halil efendi b. Hasan el-imâm, el-Hâc Hasan Halîfe el-müezzin, Mustafa Ağa b. Ebûbekir, Ahmed Efendi b. Yahya kādı-yı Erim, Bektaş b. Hasan, Hüseyin b. Hasan, Ali b. Mehmed.