Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 63 Hüküm no: 18 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabaş mahallesinden Fatıma’nın ev eşyasını kardeşine sattığı Mahmiye-i İstanbul’da Yenibahçe kurbünde Karabaş mahallesi sâkinelerinden Fâtıma bt. Ali nâm hatun zâtı ba‘de’t-ta‘rîf meclis-i şer‘-i şerîf-i enverde li-ebeveyn er karındaşı bâ‘isü hâze’l-kitâb Müezzin Mehmed Halîfe nâm kimesne mahzarında ikrâr ve takrîr-i kelâm edip eşyâ-i memlûkemden üç tencere ve dokuz sahan ve bir lenger ve bir maşraba ve iki tâbe ve iki sini ve bir leğen ma‘a ibrik ve iki hamam tası ve iki şam‘dân ve üç yemenî yorgan ve bir orta keçesi ve üç yemenî mak‘adım bi-safkatin vâhidetin tarafeynden îcâb ve kabûlü hâvî bey‘-ı bât ile yüz guruşa mezbûr Mehmed Halîfe’ye bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr yüz guruş mutâlebesinden karındaşım mezbûr Mehmed Halîfe’nin zimmetini ibrâ-i âmm-ı râfi‘u’l-hısâm ile ibrâ ve ıskāt eyledim. Ba‘de’l-yevm eşyâ-i muharrere-i mezkûrenin mecmû‘u karındaşım mezbûr Mehmed Halîfe’nin mülk-i müşterâsı olmuşdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâdî ve’l-işrîn min-şehri Ramazani’l-mübârek li-sene selâse ve erba‘în ve mie ve elf. Şuhûdü’l-hâl: Ahmed Çelebi b. Hasan, Kādızâde İbrahim b. Mustafa, İvaz b. Abdullah, es-Seyyid Ali Çelebi b. Mustafa.