Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 63 Hüküm no: 19 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Finese köyü gayrimüslim reayasından kanuna aykırı fazla vergi alınmamak şartıyla vergilerini vereceklerini taahhüd ettikleri Medîne-i Kayseriye a‘mâlinden Nevşehir kasabasında vâki‘ câmi‘-i şerîf vakfına mülhak Finese karyesi vakfının evlâdiyet ve meşrûtiyyet üzere bi’l-fi‘il mütevellîsi olan fahrü’l-a‘yân Mehmed Bey b. Halil b. Ali tarafından husûs-ı âti’l-beyâna vekîl olduğu Bostânî İbrahim Bey b. Receb ve Ahmed Bey b. Mevlüd nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan el-Hâc Musa Ağa b. el-Hâc İsa nâm kimesne meclis-i şer‘-i şerîf-i enverde karye-i mezkûre re‘âyâsından işbu ashâbü’s-sifr Haçador v. Uğurlu ve Anderyas v. Simaven ve Agop v. Niçisar v. Sergiz v. Ogoz Osmiz ve Sahak v. Toromşe ve Artin v. Dunik ve Karabet v. Danyel vesâirleri muvâcehelerinde bi’l-vekâle takrîr-i kelâm ve bast-ı merâm edip mezkûrûn re‘âyâ vakf-ı mezbûr zâbitleri kadîme mugāyir ve Defter-i hakanîye muhâlif her birimize zulm ve te‘addî birle ziyâde harc nâmıyla nesne taleb ve bizi rencîde ederler deyü der-i devlet-medâra arzuhâl birle teşekkî etmeleriyle fîmâ-ba‘d kadîmden olıgeldiği üzere ber-mûceb-i defter-i hakānî müteehhil olanlardan senede ancak on iki akçe ve bekârlarından altı akçe ve resm-i bennâk yüz ev başına senede otuzar akçe resm alıp ziyâde almayıp ve âhara dahi izin vermeyip ve mezbûrûn re‘âyâ dahi zikrolunan rüsûmâtdan noksan vermemek üzere her biri râzı ve ber-vech-i muharrer kavl ü ittifâk ve ahd ü mîsâk eylediler dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-âşir min-şehri Ramazani’l-mübârek li-sene selâse ve erba‘în mie ve elf. Şuhûdü’l-hâl: Mehmed Çelebi b. Abdullah, Salih Çelebi b. Süleyman, Yakub b. Abdullah, Abdullah b. Mustafa, Duhânî Mehmed b. Ahmed, Du‘âcı Molla İbrahim b. Mustafa, Ahmed b. Hasan.