Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 64 Hüküm no: 20 Orijinal metin no: [4a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aynaroz adası Vatopit köyünden Râhip Kiryanos’un terekesinin vârisleri arasında taksimi Bahr-i Sefîd’de Aynaroz cezîresinde vâki‘ Vatopit nâm manastır sâkinlerinden iken târih-i kitâbdan on sekiz sene mukaddem hâlik olan Kiryanos v. Yorgi v. Yani nâm râhibin verâseti li-ebeveyn kız karındaşı İsmine nâm Nasrâniye ile li-ebeveyn er karındaşı Dimitri nâm hâlikin sulbî kebîr oğulları Diyakoz Gavrili ve Praşkova ve Manol ve âhar karındaşı İstavrinos nâm hâlikin oğlu Yorgi’ye ve diğer karındaşı Yade nâm hâlikin oğlu Diyakozpenyos nâm râhibeye münhasıra oldukdan sonra merkūm Manol meclis-i şer‘-i şerîf-i enverde bâ‘isü hâze’s-sifr Papa Nikifor v. Yani v. Dimo nâm zimmî tarafından husûs-ı âti’z-zikre vekîl olduğu Ahmed Beşe b. Abdullah ve Anastaş v. Nikola şehâdetleriyle şer‘an sâbit olan Kostantin v. Alesandrı nâm zimmî muvâcehesinde üzerine da‘vâ ve takrîr-i kelâm edip ben târih-i mezkûrede sagīr bulunmamla [4b] müvekkil-i mezbûr mûrisim hâlik-i mersûmun terekesinden yüz elli dokuz bin beş yüz akçesini ahz u kabz etmeğin vekîl-i mezbûra suâl olunup tereke-i mezkûreden on beş bin dokuz yüz elli akçe hisse-i irsiyemi bana def‘ ve teslîme tenbîh olunması matlûbumdur dedikde gıbbe’s-suâl vekîl-i mezbûr cevâbında hâlik-i mersûmun terekesini müdde‘î-yi mezbûrun ber-vech-i muharrer hâl-i sıgārında vasîyy-i muhtârı Papa Filodiyo ve nâzırı Danyel v. Praşkova ve karındaşları olup hâlâ Tekfurdağı kasabasında sâkin mezbûrân Diyakoz Gavrili ve Praşkova vesâir verese-i mezkûresi ber-mûceb-i defter-i kassâm ahz u kabz ve ber-vech-i muharrer iktisâm ve bir birilerini ibrâ etmişler idi deyü takrîrlerine muvâfık birkaç kıt‘a hüccet ve defter-i kassâm ibrâz ve müvekkil-i mezbûrun tereke-i mezbûreye kat‘a vaz‘-ı yedini bi’l-vekâle inkâr edicek müdde‘î-yi mezbûr Manol zimmîden ber-minvâl-i muharrer müdde‘âsını mübeyyine beyyine taleb olundukda ityân-ı beyyineden izhâr-ı acz edip mukaddemâ yemîn dahi vermeğin mezbûr Manol müvekkil-i merkūma bilâ-beyyine bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-işrîn min-şehri Ramazani’l-mübârek li-sene selâse ve erba‘în mie ve elf. Şuhûdü’l-hâl: Mehmed Çelebi b. Abdullah, Mehmed Kasım b. el-Hâc Hüseyin, Du‘âcı Molla İbrahim b. Mustafa, Salih b. Süleyman, Abdullah b. Abdullah, Ahmed b. Hasan.