Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 65 Hüküm no: 21 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arutin v. Megarli’nin vârisleri babalarının ortağı Karabet’te olan alacakları için açtıkları davanın sulhla sonuçlandığı 150.000 013.000 Guruşa sulh ve ibrâ. Mahmiye-i İstanbul’da Vâlide Hânı ahâlîsinden iken bundan akdem hâlik olan Arutin v. Megarli’nin verâseti zevcesi Tarfanda bt. Mardiros nâm Nasrâniye ile sulbî kebîr oğulları Kivro ve Agop ve Mıgırdıç nâm zimmîlere ve kebîre kızları Deri ve Tarfanda nâm Nasrâniyelere münhasıra olduğu lede’ş-şer‘i’l-enver zâhir ve mütehakkık oldukdan sonra kendinden asîl ve mezbûre Tarfanda bt. Mardiros ile mezbûrân Agop ve Mıgırdıç zimmîler ve mezbûretân Deri ve Tarfanda taraflarından meblağ-ı âti’z-zikri taleb ve da‘vâ ve ahz u kabza ve lede’l-iktizâ sulh ve ibrâya vekîl olduğu zât-ı mezbûrâtı ma‘rifet-i şer‘iye ile ârifân Hanom v. Gaspar ve Lesobus v. Bogos ve Mihail v. Pavram nâm zimmîler şehâdetleriyle muvâcehe-i hasm-ı câhidde şer‘an sâbit ve sübût-ı vekâletine hükm-i şer‘î lâhık olan merkūm Kivro ile hâlik-i merkūmun hayatında meblağ-ı âti’l-beyânda şerîki olan Filyoz v. Hamat nâm zimmîler meclis-i şer‘-i şerîf-i enverde râfi‘u’s-sifr Karabet v. Minas nâm zimmî muvâcehesinde her biri bi’l-asâle ve bi’l-vekâle ikrâr ve takrîr-i kelâm edip târih-i kitâbdan on iki sene mukaddem merkūm Karabet zimmî hâlik-i mezbûr Arutin ile müşterek mâllarımızdan yedimizden on beş bin guruş istikrâz ve kabz ve mesârifine sarfla isithlâk edip meblağ-ı merkūm elân mesfûr Karabet zimmî zimmetinde bâkī kalmışidi deyü merkūm Karabet zimmîden bi’l-asâle ve bi’l-vekâle taleb ve da‘vâ eylediğimizde ol dahi inkâr etmekle beynimize münâza‘ât-ı kesîre ve muhâsamât-ı şedîde vâki‘a olmuşidi. El-hâletü-hâzihi beynimizde muslihûn tavassut edip merkūm Karabet zimmî ile da‘vâ-yı mezkûremizden bizi bin üç yüz guruş üzerine sulh eylediklerinde bize dahi bi’l-asâle ve bi’l-vekâle sulh-ı mezbûru kabûl ve bedel-i sulh olan bin üç yüz guruşu yedinden ahz u kabz edip husûs-ı mezbûra vesâire müte‘allika âmme-i de‘âvî ve mutâlebât ve eymân ve muhâsamâtdan merkūm Karabet zimmînin zimmetini bi’l-asâle ve bi’l-vekâle ibrâ ve ıskāt eylediğimizde ol dahi kabûl ve bize bedel-i sulh deyü medfû‘u olan bin üç yüz guruşa müte‘allika da‘vâdan bizim zimmetimizi ibrâ ve ıskāt etmekle min-ba‘d merkūm Karabet zimmî ile vechen mine’l-vücûh ve sebeben mine’l-esbâb da‘vâ ve nizâ‘ ve husûmetimiz kalmadı dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 min-şehri Ramazan sene [1]143 Şuhûdü’l-hâl: Mehmed Efendi b. İbrahim, Fethullah Çelebi b. Hacı Mehmed Ağa, Ömer Ağa b. el-Hâc Osman, Süleyman Ağa b. el-Hâc Veli, el-Hâc İsmail Kafesdâr, Hüseyin Çavuş Ağa b. el-Hâc İbrahim b. ( ), Bezzâstânî el-Hâc Hüseyin b. el-Hâc Ahmed b. Hasan, Abdullah Efendi, Sarrâf Kigor v. Minas, Sarrâflar Kethudâsı Arutin v. Tökeli, Arutin v. Marat, Arutin v. Mardiros, Sergiz v. Ahram, Agop v. Yosef, Bagdasar v. Karzarat, Agop v. Kazer, İvgas v. Hristor?