Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 66 Hüküm no: 22 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hanım’ın Gülcâmii mahallesinde bulunan evini Zeyneb Hanım’a sattığı Husûs-ı âti’l-beyânın mahâllinde ketb ü tahrîri için bi’l-iltimâs savb-ı şer‘-i şerîf-i enverden irsâl olunan Mevlânâ Mehmed Efendi b. İbrahim Efendi Dârü’l-hilâfeti’l-aliyye Kostantıniyyeti’l-mahmiye’de Gül Câmi‘-i şerîfi mahallesinde vâki‘ Sinan Paşa mescid-i şerîfi kurbünde sâkine Fâtıma Hanım bt. el-merhûm Kapıcıbaşı Şirin İbrahim Ağa’nın zikri âtî menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i kavîm ettikde mezbûre Fâtıma Hanım zâtı Emîn Mehmed Efendi b. Mehmed ve İbrahim b. Mehmed nâm kimesneler ta‘rîfleriyle mu‘arrefe oldukdan sonra meclis-i ma‘kūd-ı mezkûrda yine mu‘arrifân-ı mezbûrân ta‘rîfleriyle mu‘arrefe olan bâ‘isetü’l-vesîka Zeyneb bt. ( ) nâm hatun mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhinde münselik olup mahalle-i mezbûrede vâki‘ bir tarafdan Tekneci Ali Beşe ve Taşçı Köse Ali Beşe ve bir tarafdan Mehmed Ağa nâm kimesneler menzilleri ve bir tarafdan tarîk-ı hâs ile mahdûd üç bâb fevkānî oda ve iki sofa ve kenîf ve havluyu muhtevî mülk menzilimin nısf-ı şâyi‘ini cümle tevâbi‘ ve levâhıkıyla tarafeynden îcâb ve kabûlü hâvî şurût-ı müfsideden ârî bey‘-ı kat‘î ile mezbûre Zeyneb Hatun’a iki yüz elli guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm eylediğinden sonra semeni olan meblağ-ı mezbûr iki yüz elli guruşu mezbûre Zeyneb Hatun yedinden tamamen ahz u kabz eyledim. Min-ba‘d menzil-i mahdûd-ı mezkûrun nısf-ı şâyi‘i mezbûre Zeyneb Hatun’un mülk-i müşterâsı olmuşdur dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ü tahrîr ve ma‘an ba‘s olunan Mustafa b. Abdullah ve Mustafa b. Hasan ile meclis-i şer‘a gelip inhâ etmeğin mâ-vaka‘a bi’t-taleb ketb olundu. Fî 28 min-şehri Ramazani’l-mübârek sene [1]143 Şuhûdü’l-hâl: Mehmed Efendi b. İbrahim, Emîn Mehmed Efendi b. Mehmed el-imâm, Bostânî Ömer Efendi, Mustafa Efendi b. ( ) el-imâm, Mehmed b. Abdullah.